77 ترکي ساختماني شرکت د ځمکې غوښتنه وکړه
![picture](/sites/default/files/2024-06/3.jpeg)
۱۴۴۵/۱۱/۲۶
د کور او ښار جوړولو وزارت محترم سرپرست وزیر شیخ حمدالله نعماني، په خپل کاري دفتر کې د 77 ساختماني ترکي شرکت له مرستیال بُراق اُنسال سره وکتل.
لومړی، د 77 ترکي ساختماني شرکت مرستیال بُراق اُنسال په بېلا بېلو ولایتونو کې د خپل شرکت د تولیداتو او فعالیتونو په اړه معلومات وړاندې کړل او په ځانګړې توګه یې د لویو پلونو او پایو برخه کې د تولیدي فابریکي فعالیتونه بیان کړل چې د کابل په صنایع سبز ښارګوټي کې فعالیت کوي.
نومړي وویل، د لویو پلونو تولید د انجنیرۍ معیارونو او کیفیت له پلوه پراخ ځای ته اړتیا لري، تر څو په کې د (۲۸) ورځو لپاره سالم کېښودل شي.
اُنسال وویل، دا چې د یادو پلونو د تولید فابریکې ساحه نسبتاً کمه ده، نو په خبره یې اړتیا ده چې د څنګ ځمکه هم په اختیار کې ورکړل شي، تر څو تولید شوي پلونه د زیاتې مودې لپاره هلته ځای په ځای کړي.
دوی په دغه برخه کې د کور او ښار جوړولو وزارت د همکارئ غوښتنه وکړه، چې په یاده ځمکه کې د فعالیت کولو اجازه ورکړي.
د کور او ښار جوړولو وزارت محترم سرپرست وزیر شیخ حمدالله نعماني وویل، د صنایع سبز صنعتي ښارګوتي ځمکه له حقوقي او تخنیکي پلوه ستونزې لري چې وزارت یې د حل کولو په لټه کې دی.
ښاغلي شیخ حمدالله نعماني د 77 ساختماني شرکت مرستیال او راغلي پلاوي ته وویل، کولای شي د پېروزي ښارګوټي په ختیځه برخه کې نوره ځمکه ورکړي، چې دوی په کې فعالیت پیل کړي.
د نوموړي په خبره، بله لاره یې دا ده چې د صنایع سبز صنعتي ښارګوټي په پلان کې تعدیلات رامنځته شي، خو داسې چې په یاده ساحه کې شنې ساحې، ریل پټلۍ او د پېروزي هستوګنیز ښارګوټي هستوګنیزه ساحه زیانمنه نه شي.
د کور او ښار جوړولو وزارت د تولیدي او صنعتي فابریکو د فعالیت لپاره منظم ښارګوټي جوړوي چې د نورو اړوندو ادارو په همغږۍ او همکارۍ یې چارې پر مخ وړل کېږي.