پکتیکا کې د دوه سوداګریزو مارکېټونو ترمنځ خدماتي ساحه خوندي شوه
۱۴۴۶/۸/۱۰
د کور او ښار جوړولو وزارت له ښاري تخلفاتو د مخنیوي ریاست محترم رئیس مولوي عبدالمنان حقاني وایي، د پکتیکا د کور او ښار جوړولو ریاست د محترم رئیس مولوي محمد طاهر سیف الجهاد په هدایت یې اړوند ټیم د پکتیکا د مرکز ښرنې په خیبر بازار کې د نویو جوړېدونکو دوه سوداګریزو مارکېټونو په منځ کې خدماتې ساحه حفظ کړه.
ښاغلی مولوي حقاني وایي، د سوداګریزو مارکېټونو مالک له لوري د سیخ لرونکي کانکرېټي فرش او دېوال سربیره، د لومړي پوړ د بیمونو سیخان د دوه مارکیټونو د یو ځای کېدو پهٔ موخه پرېښودل شوي وو.
نوموړی وایي، د مرکز ښرنې په تفصیلي پلان کې د یادو دوه سوداګریزو مارکېټونو په منځ کې د شپږ (6) متره په اندازه، خدماتي ساحه په پام کې نیول شوې وه چې، دوی خوندي کړه.
هغه وایي، پکتیکا کې د کور او ښار جوړلوو ریاست محترم رئیس مولوي محمد طاهر سیف الجهاد د دواړو مارکېټونو مالک ته وویل چې، خپلې ټولې چارې د قانون سره سم ترسره کړي او له هر ډول خپلسره کړنو څخه ډډه وکړي.
ښاغلي مولوي عبدالمنان حقاني وایي، د دغې موضوع په اړه یې د مرکز ښرنې د ښاروالۍ محترم ریاست ته د (۳۶۳/۶۰۱) ګڼه لیک په ذریعه خبر ورکړ.
نوموړی وایي، د مرکز ښرنې ښاروالۍ باید د یادو مارکیټونو ترمنځ پلان شوې ساحه کې ګول سیخونه چې د لومړي پوړ په بیمونو کې پرېښودل شوي او د نقشې خلاف دي، پرې کړي.
