د ننګرهار او پکتیکا لپاره مهم ګام؛ د مهاجرینو ښارګوټو اصلاحي پلانونه منظور شول
۱۴۴۷/۱۰/۲۱
د کور او ښار جوړولو وزارت محترم وزیر الحاج مولوي نجیب الله حیات حقاني، په خپل کاري دفتر کې، د ننګرهار او پکتیکا ولایتونو اړوند د مهاجرینو د ښارګوټو تفصیلي اصلاحي پلانونه منظور کړل.
د ا.ا زعیم عالیقدر امیرالمؤمنین حفظه الله تعالی و رعاه د فرمان سره سم، د ننګرهار ولایت د مهاجرینو ښارګوټي کې ټولې (۴۳۳۹) پنځه بسوه یي استوګنیزې نمرې او د پکتیکا ولایت د مهاجرینو په ښارګوټي کې ټولې (۳۲۹۱) پنځه بسوه یي استوګنیزې نمرې په پام کې نیول شوي دي.
د یادو پلانونو موخه په دغو ولایتونو کې د راستنېدونکو او بېځایه شوو کورنیو لپاره د معیاري او منظم استوګنیزو ښارګوټو رامنځته کول دي، څو هغوی ته د سرپناه تر څنګ بنسټیز خدمات هم برابر شي.
ترڅنګ یې د سړکونو جوړول، د پاکو اوبو رسولو سیستم، برېښنا، عامه تأسیسات، ښوونیز او روغتیايي مرکزونه، او نور اړین ښاري خدمات هغه څه دي چې په هر پلان کې ورته بشپړه پاملرنه کېږي.
محترم وزیر الحاج مولوي نجیب الله حیات حقاني، د پلانونو د منظورۍ په مهال ټینګار وکړ، چې اړوند تخنیکي ټیمونه دې د دغو پروژو د عملي کېدو لپاره لازم چمتووالی ونیسي او چارې دې یې د معیاري اصولو سره سم پر مخ یوسي.
همدارنګه، ښاغلي حقاني اړوندو ریاستونو ته لارښوونه وکړه چې د پلانونو د تطبیق بهیر دې په چټکۍ سره پیل کړي او په دې برخه کې دې له نورو همکارو ادارو سره لازمې همغږۍ ته دوام ورکړي، څو یادې پروژې په ټاکلي وخت بشپړې او ګټې اخیستنې ته وسپارل شي.
د کور او ښار جوړولو وزارت ژمن دی، چې د هېواد په بېلابېلو ولایتونو کې د ښاري پراختیا او د خلکو د ژوند د شرایطو د ښه والي لپاره خپلې هڅې لا ګړندۍ کړي.
