د ودانیزو او استوګنیزو د نقشو تخنیکي کمیسیون ناسته تر سره شوه
۲۱/۱۰/۱۴۴۷
د کور او ښار جوړولو وزارت د مسکن، ودانیزو چارو او د برنامو د پراختیا د محترم معین الحاج ګل زرین صابر په مشرۍ، د د ودانیزو او استوګنیزو نقشو تخنیکي کمیسیون خپله دویمه ناسته تر سره کړه چې په دې ناسته کې د اړوند ریاستونو محترمو رئیسانو او مسؤلینو ګډون کړی و.
په غونډه کې محترم معین د کار د چټک پرمختګ او د کمیسیون د غړو ترمنځ د اړینې همغږۍ پر اهمیت خبرې وکړې، هغه په ځانګړې توګه د میکانیزم جوړولو، د چیک لیست ترتیب او د اړوند فورم په سم او دقیق جوړولو ټینګار وکړ.
ښاغلي معین همدارنګه وویل چې د کمیسیون غونډې باید دوامداره وي او د اړتیا او ضرورت پر اساس ترسره شي، هغه ټینګار وکړ چې هره پروژه، که د کور او ښا جوړولو وزارت اړوند وي او یا د نورو ادارو اړوند وي باید تر کار لاندط جدي ونیول شي.
د غونډې په جریان کې د کمیسیون غړو خپل وړاندیزونه او نظریات وړاندې کړل، دوی د کار د چټکولو، د میکانیزم اصلاح، د چیک لیست بشپړتیا، او د ودانیزو نقشو فورم د ترتیب په اړه خپل نظر ورکړ، همدارنګه یې ټینګار وکړ چې ټولې پروژې باید د چیک لیست مطابق په منظم ډول تر کار لاندې ونیول شي.
ویل کېږي چې د دې غونډې وروسته به د کمیسیون له خوا د ودانیزو او استوګنیزو نقشو تخنیکي او اداري ارزونه ترسره شي او د امارتي او شخصي پروژو په اړه به هم څېړنې وشي.
