ښارجوړولو او ځمکو سرپرست وزیر له لغمان والي سره وکتل
محترم محمود کرزی د ښار جوړولو او ځمکو وزارت سرپرست وزیر له محترم محمد آصف ننګ د لغمان والي سره وکتل او د پراختیايی او ټولګټو پروژو د تطبیق پر څرنګوالي خبرې وکړې.
په سر کې، محترم محمد آصف ننګ د لغمان والي د ټولګټو پروژو د تطبیق لپاره د ځمکو د انتقال، د ښارګوټو و دجوړولو، د ساختماني پروژو د چارو پر ګرنډیتوب او د تفصیلي پلانونو په منظورۍ باندې خبرې وکړې او د یاد وزارت څخه د همکاری غوښتنه وکړه.
ورپسې د ښارجوړولو او ځمکو وزارت سرپرست وزیر محترم محمود کرزي لغمان د هغو ولایتونو څخه یاد کړ چې د ښارجوړولو او ځمکو وزارت په لومړیتوب کې دی او د انکشافي پروژو د تطبیق په برخه کې هر ډول همکارۍ ته چمتو دی.
د ښارجوړولو او ځمکو سرپرست وزیر د لغمان له والي څخه وغوښتل چې د ټولګټو پروژو د تطبیق لپاره د ځمکې لېږد په برخه کې خپل مشخص وړاندیزونه وزارت سره شریک کړي څو دا وړاندیزونه طی مراحل او د پام وړ ځمکه په خپل وخت متقاضي ادارو ته په یاد ولایت کې ولېږدول شي.
محترم محمود کرزي د لغمان ښارجوړولو رئیس ته هدایت ورکړ څو د لغمان والي سره په همغږئ د مسکن او ښارګوټو جوړولو په برخه د پانګونې طرحه جوړه او په یاد ولایت کې خصوصي سکټور ته د پانګونې زمینه مساعده کړي.
همداراز د لغمان شهرسازی رئیس ته هدایت ورکړل شو څو په یاد ولایت کې د جایدادونو د ثبت دفتر جوړ او د جایدادونو د ثبت او د ملکیت سند ویش په برخه کې عملي اقدمات تر لاس لاندې ونیسي.
په همدې ترتیب د لغمان ښارجوړولو رئیس ته هدایت ورکړل شو څو د بیروکراسۍ د ختمولو او د پروژو د ژر پېلېدو لپاره تر دې وروسته د پروژو د داوطلبۍ پروسه د والي تر نظر لاندې د ولایت په مقام کې ترسره شي.
همداراز د تدارکاتو رئیس ته هدایت ورکړل شو څو د قرار دادونو د تعدیل او همداراز د پروژو د تطبیق په برخه کې ستونزې په خپل وخت حل او د پروژو د تطبیق په برخه کې هر ډول خنډونه لمنځه یوسي.
د ښارجوړولو او ځمکو سرپرست وزیر همداراز رئیس دفتر ته دنده وسپارله څو د لغمان ولایت مقام لخوا په ورستیو مېاشتو کې د ځمکې د انتقال په برخه کې هغه ټول وړاندیزونه چې دې وزارت را رسېدلي، وڅېړي او د طی مراحل لپاره یې جدي او عملي اقدمات وشي.
محترم محمد کرزي ټولو مسولینو ته هدایت ورکړ چې د ساختماني پروژو په تطبیق کې ځنډ ورته د منلو وړ نه دی او هرڅوک چې په مرکز او ولایاتو کې د پروژو د تطبیق په برخه کې خنډ جوړوي ورسره به جدي او قانوني چلند وشي.
###
