هلمند ولایت کې د یتیمانو لپاره د هستوګنیز ښارګوټي جوړولو د بنسټ ډبره کېښودل شوه
۱۴۴۵/۱۰/۱۸
د امیر المؤمنین حفظه الله د ځانګړي حکم پر اساس د کور او ښار جوړولو وزارت له لوري د هلمند ولایت نهر سراج ولسوالۍ کې د پنځه سوه یتمیانو لپاره عصري او د ژوند له ټولو اسانتیاوو څخه د برخمن هستوګنیز ښارګوټي پر جوړولو کار پیل او د بنسټ ډبره یې کېښودل شوه.
د کور او ښار جوړولو محترم سرپرست وزیر شیخ حمدالله نعماني وویل: د خوښۍ احساس کوي چې په هلمند ولایت کې د یتیمو کورنیو لپاره سر پناه جوړوي.
ښاغلي نعماني وویل، په ټول هېواد کې تر ټولو زیاته ستونزه د سر پناوو نه شتون دی، چې په خبره یې د دې ستونزې د حل لپاره یې هڅې پیل کړي دي.
نوموړي زیاته کړه، افغانستان کې له ۲،۵ تر ۳ میلیونه نفوس د اوسېدو لپاره سرپناه او مناسب ځای نه لري چې د دې ستونزې د حل لپاره د کور او ښار جوړولو وزارت د خپل کاري پلان زیاته برخه ځانګړې کړې ده.
د یاد هستوګنیز ښارګوټي د بنسټ ډبرې اېښودلو مراسمو کې د کور او ښار جوړولو وزارت د محترم سرپرست وزیر شیخ حمدالله نعماني سربېره د اطلاعات او کلتور محترم سرپرست وزیر ملا خیرالله خیر خوا، د هلمند مرستیال والي محترم مولوي محمد نبي حماس، د دغه ولایت امنیه قوماندان محترم مولوي عبدالحکیم مبارک، د کور او ښار جوړولو محترم رئیس مولوي سید نیک محمد متصم، د هلمند د اطلاعات او کلتور محترم رئیس حافظ عبدالباري راشد، د قطر هېواد د شاهي کورنۍ د خیریه بنسټ استازي او ځینو نورو رئیسانو او د ادارو مسؤلینو ګډون کړی وو.
د یادولو وړ ده، چې یاد هستوګنیز ښارګوټی په ۲۷۲ جریبه ځمکه کې جوړېږي او د لګښت چارې د قطر هېواد د شاهي کورنۍ خیریه بنسټ په غاړه اخیستې دي، چې نورې چارې به یې د کور او ښار جوړولو وزارت تر چتر لاندې پر مخ وړل کېږي.
