د کابل ښار او شکردرې ولسوالۍ په ځینو سیمو کې د صنعتي فعالیتونو له وضعیت څخه څارنه وشوه
۱۴۴۸/۱/۱۲
د کور او ښار جوړولو وزارت د کیفیت کنټرول او ښاري تخلفاتو د مخنیوي عمومي ریاست اړوند د ښاري تخلفاتو د مخنیوي ریاست د رسېدنې او عامه پوهاوي آمریتونو موظفو ټیمونو د کابل ښار د اوولسمې ناحیې او د کابل ولایت د شکردرې ولسوالۍ په یوې برخې کې د صنعتي فعالیتونو له وضعیت څخه څارنه وکړه.
د دغې څارنې موخه د هغو تولیدي شرکتونو او فابریکو پېژندنه او ارزونه وه چې د کابل ـ شمال لویې لارې په اوږدو کې د ښاري پلانونو له رعایت پرته جوړې شوې او فعالیت کوي.
په دغو فابریکو کې د ډبرو د پروسس، اوسپنې ویلې کولو، پلاستیکي توکو تولید، درمل جوړونې او نور صنعتي فعالیتونه شامل دي.
د څارنې پر مهال د فابریکو موقعیتونه او د فعالیت ډولونه تثبیت او په اړه یې لومړني معلومات راټول شول.
همدارنګه له مالکینو وغوښتل شول چې د ودانیزو چارو او فعالیتونو اړوند اسناد، جوازونه او نور قانوني مدارک وړاندې کړي، څو له بشپړې ارزونې وروسته د ښاري قوانینو او مقرراتو له مخې لازم تصمیم ونیول شي.
د یادونې وړ ده چې د ښار جوړونې د نافذه قوانینو او مقرراتو له مخې، صنعتي فابریکې او ورته فعالیتونه باید په ځانګړو او منظور شویو صنعتي ښارګوټو کې ترسره شي.
یاده څارنه د ښاري قوانینو د پلي کېدو د ډاډ، د غیرمجازو صنعتي فعالیتونو د مخنیوي او د ښاري او ساختماني تخلفاتو د پراختیا د محدودولو په موخه ترسره شوې ده.
