د ښار جوړولو او ځمکو وزارت د تخنیکي بورډ غونډه جوړه شوه
23/01/1444
د ښار جوړولو او ځمکو وزارت د تخنیکي بورډ څلورمه غونډه د ښار جوړولو او ځمکو وزارت د سرپرست محترم مولوي حمدالله نعماني په مشرۍ د دغه وزارت د رئیسانو، آمرینو او د پروژو مسؤلینو په ګډون جوړه شو
په دې تخنیکي ناسته کې د خواجه رواش ښارګوټي د استوګنې د بلاکونو د جوړولو پروژې د ستونزو د حل په اړه خبرې وشوې.
په هېواد کې د هستوګنې کمپلکسونو (دولتي، نیمه دولتي او خصوصي) او د کابل په نوي ښار کې د خاور ښارګوټي د فعالیت د اجازې په اړه خبرې وشوې.
د ښار جوړولو او ځمکو وزارت سرپرست مولوي حمدالله نعماني د ښارګوټي د درېیو هستوګنې بلاکونو د معلوماتو د بشپړولو او د ستونزو د څېړلو او همدا راز په مرکز او ولایتونو کې د ښارګوټو په اړه د اړتیا وړ معلوماتو د راټولولو په موخه کاري کمېټې وګمارلي.
همدارنګه په یو شمېر ولایتونو کې د استوګنې سیمو په سوداګریزو سیمو د بدلولو او د فیس د ورکړې د ستونزې د حل په موخه د ښاري پروژو پلان جوړونه او ترمیم د دې غونډې له نورو موضوعاتو څخه وو چې بحث او خبرې اترې پرې وشوې.
په یاده ناسته کې بورډ ته دنده وسپارل شوه چې د ښاري پروژو پلان کولو او ترمیم لپاره د فیس بل بیاکتنه وکړي.
