د راستنو شوو مهاجرو لپاره د استوګنیزو نمرو د ورکړې بهیر ګړندی شوی؛ ننګرهار کې سلګونه کورنیو ته نمرې ورکړل شوې
۱۴۴۷/۱۱/۱۳
د کور او ښار جوړولو وزارت، محترم وزیر الحاج مولوي نجیب الله حیات حقاني، ننګرهار ولایت ته سفر وکړ، چې لاسته راوړنې هم لري.
ښاغلي وزیر، ننګرهار ولایت ته د خپل رسمي سفر پر مهال (۳۳۵) راستنو شوو مهاجرو کورنیو ته د استوګنې نمرې ووېشلې.
دا نمرې د منظم پلان له مخې برابرې شوې دي، څو راستنو شوو مهاجرو کورنیو ته د سرپناه زمینه برابره او د هغوی د ژوند شرایط ښه شي.
دا بهیر لا هم دوام لري او ټاکل شوې ده، چې په نږدې راتلونکې کې نورو کورنیو ته هم نمرې ورکړل شي.
د کور او ښار جوړولو وزارت محترم وزیر الحاج مولوي نجیب الله حیات حقاني د وېش پر مهال ټینګار وکړ چې امارت ژمن دی د مهاجرو وګړو د مسکن ستونزې هوارولو لپاره زمینه برابره کړي او هغوی ته دایمي حل لارې ومومي.
نوموړي د خپلو خبرو په دوام وویل، د استوګنې نمرې وېش به د شفافیت، عدالت او اړتیا پر بنسټ ترسره کېږي.
په ورته مهال، د ننګرهار ولایت اړوندو راستنو شوو مهاجرو کورنیو د دې پروسې هرکلی وکړ او دا یې د خلکو د بنسټیزو اړتیاوو د پوره کېدو په برخه کې مهم ګام وباله.
د دوی په وینا، د دغه ډول پروګرامونو دوام کولی شي د بېځایه شوو کورنیو اقتصادي او ټولنیز وضعیت تر یو بریده ښه کړي او د استوګنې نمرې ترلاسه کول به د هغوی د ژوند په ثبات کې مهم رول ولوبوي.
