د لوګر ولایت محمد اغې صنعتي پارک لپاره تفصیلي پلان تائید او د تطبیق لپاره وسپارل شو
۱۴۴۷/۹/۲۲
د کور او ښار جوړولو وزارت، محترم وزیر الحاج مولوي نجیب الله حیات حقاني په خپل کاري دفتر کې، د لوګر ولایت د محمد اغې د صنعتي پارک لپاره جوړ شوی تفصیلي پلان تائید او لاسلیک کړ.
د محمد اغې صنعتي پارک د لوګر ولایت د محمد اغې په ولسوالۍ کې موقعیت لري او د افغانستان په مرکزي سیمه کې له مهمو صنعتي پارکونو څخه شمېرل کېږي.
دا پارک د صنعتي فعالیتونو د پیاوړتیا، د کورنیو تولیداتو د زیاتوالي او د سوداګرو او صنعتکارانو لپاره د پانګونې د زمینې برابرولو په موخه جوړ شوی دی.
د دې صنعتي پارک مساحت شاوخوا ۵۰۰ جریبه ځمکه ده، چې د فابریکو او تولیدي تأسیساتو د جوړولو لپاره ځانګړې شوې ده.
د پلان له مخې، د دې پارک ځمکه لسګونو تولیدي شرکتونو ته وېشل شوې ده او تمه کېږي چې له ۸۵ څخه زیات تولیدي شرکتونه به په کې خپل فعالیتونه پیل کړي.
دا صنعتي پارک د لوګر ولایت په اقتصادي ودې او د سیمې د خلکو لپاره د کاري فرصتونو په رامنځته کولو کې مهم رول لري او کولای شي زرګونه کسان په مستقیم او غیر مستقیم ډول په کار بوخت کړي.
