په جوزجان ولایت کې د قالین اوبدونکو د مارکېټ د ودانیزو چارو څارنه ترسره شوه
۱۴۴۷/۵/۳
د جوزجان ولایت د کور او ښار جوړولو ریاست محترم رئیس ملا عبدالله فیضان وایي، د دې ریاست اړوند تخنیکي ټیم د شبرغان ښاروالۍ د قالین اوبدونکو مارکېټ د ودانیزو چارو له بهیر څخه تخنیکي څارنه او لیدنه ترسره کړه.
ښاغلي ملا فیضان وویل، د مارکېټ د لومړي پوړ د شا برخې کانکریټ اچونې چارې روانې وې چې له نږدې څارنې لاندې ونیول شوې. انجنیرانو د کار د کیفیت او د ودانیزو معیارونو د رعایت په برخه کې لازمې سپارښتنې وکړې او د پروژې مسؤلینو ته یې لارښوونه وکړه چې کارونه دې په چټکۍ او تخنیکي دقت سره پرمخ یوسي.
محترم ملا عبدالله فیضان ټینګار وکړ چې د کور او ښار جوړولو ریاست تخنیکي ټیمونه د ټولو ودانیزو پروژو له جریان څخه منظم نظارت کوي، څو ټول کارونه د انجینري اصولو، معیارونو او قانوني طرزالعملونو سره سم ترسره شي.
د جوزجان ولایت د کور او ښار جوړولو ریاست د ښار د بنسټیزو پروژو د څارنې او همغږۍ مسؤلیت لري. د قالین اوبدونکو د مارکېټ پروژه د شبرغان ښار د مهمو اقتصادي او تولیدي پروژو څخه ده، چې د تطبیق له لارې به د قالین اوبدونکو لپاره د کار، تولید او بازار موندنې فرصتونه زیات شي.
