د اقتصادي او صنعتي زونونو د پراختیا د ریاست د پروژو په اړه خبرې وشوې
۱۴۴۷/۰۲/۱۲
د مسکن، ودانیزو چارو او د برنامو د پراختیا محترم معین مولوي ګل زرین صابر، د اقتصادي او صنعتي زونونو د پراختیا د ریاست له فعالیتونو د لیدنې پر مهال، د یادې ریاست د کاري پروژو د تعقیب او پرمختګ په اړه خبرې وکړې
محترم معین، د دې لیدنې پر مهال د یاد ریاست له رئیس، آمرینو او نورو کارکوونکو سره وکتل او د اسلامي امارت د مشرتابه، په ځانګړي ډول د عالیقدر محترم امیرالمؤمنین (حفظهالله) د فرمانونو، احکامو او مصوبو د پلي کېدو پر اهمیت یې ټینګار وکړ.
ښاغلي صابر همداراز د ریاست د رئیس، آمرینو او کارکوونکو ترمنځ د همغږۍ، همکارۍ او متقابل درناوي پر اړتیا ټینګار وکړ او زیاته یې کړه چې له اغېزمنې همغږۍ پرته د برنامو او فعالیتونو د پام وړ پایلو ترلاسه کول ناشوني دي.
نوموړي د اقتصادي او صنعتي زونونو د پراختیا ریاست له رئیس او کارکوونکو وغوښتل چې د کاري چارو د چټکولو او مؤثر پرمختګ په برخه کې خپلې هڅې زیاتې کړي، تر څو د پروژو په تطبیق کې له ځنډ څخه مخنیوی وشي.
په دې لیدنه کې، د اقتصادي او صنعتي زونونو د پراختیا رئیس محترم الحاج محمد مسعود، د ترسره شوو فعالیتونو راپور وړاندې کړ، او د کاري بهیر پر وړاندې شته ستونزې او ننګونې یې هم مطرح کړې.
همداراز، د دې ریاست یو شمېر آمرینو او کارکوونکو د خپلو اهدافو، برنامو او کاري لیدلوري په اړه معلومات ورکړل، او د روانو پروژو لکه د باریک آب صنعتي زون، د محمد آغه (لوګر) اقتصادي پارک، د سروبي صنعتي پارک او د میدان وردک لوژستیکي پارک مفصل راپورونه وړاندې کړل.
