د نوي کابل ښار د پلان په اړه د تمکین شرکت له رئیس سره معلوماتي ناسته ترسره شوه
۱۴۴۷/۰۱/۰۳
د کور او ښار جوړولو وزارت د نوي کابل ښار د ملي ستراتیژیک پلان د توضیح او تشریح په موخه د متحده عربي اماراتو د تمکین نړیوال شرکت له رئیس ښاغلي صالح الدریبي سره معلوماتي ناسته وکړه.
په دې ناسته کې، د وزارت متخصصینو د نوي کابل ښار د پراختیا، جوړښت، او پړاویزو پلانونو په اړه مفصل معلومات وړاندې کړل، د یاد ښار لومړنۍ او وروستۍ طرحې، د تطبیق مراحل او فازونو ترتیب د شرکت رئیس ته روښانه کړل شول، تر څو د پانګونې هوکړې لپاره یو دقیق تخنیکي تصور برابر شي.
د نوي کابل ښار نقشه، چې د هېواد له ستر ښاري پلانونو څخه شمېرل کېږي، د وزارت د تخنیکي ټیم لخوا فاز په فاز تشریح شوه، د فازونو له مخې، دا ښار به په تدریجي ډول پراخېږي، چې هر فاز ځانګړی انکشاف، زیربنايي جوړښتونه، او خدماتي ساحې لري.
همداراز، د نقشې له مخې، هغه ولسوالۍ چې د کابل ښار د نوي پراختیا په پلان کې شاملې دي شرکت ته معرفي شوې، سربېره پر دې، د پروژې د جغرافیایي پراخوالي د روښانتیا په موخه، هغه ساحې هم مشخصې شوې چې د پروان ولایت د ځینو برخو پورې اړه لري او د نوي کابل د جوړېدو له عمومي چوکاټ سره نښلول شوې دي.
د تمکین شرکت رئیس له وزارت څخه مننه وکړه او د پلان وضاحتونه یې د پانګونې په برخه کې مهم او با ارزښته وبلل، نوموړي د خپل شرکت د تخنیکي ټیم له لوري د طرحو ارزونه تایید کړه او وې ویل چې د نوي کابل ښار د پراختیا لپاره چمتو دي، تخنیکي همکاریو ته دوام ورکړي.
د کور او ښار جوړولو وزارت ژمنه وکړه چې د نړیوالو معیارونو پر بنسټ به د هرې پانګوالې هڅې هرکلی کوي او تمه لري چې د تمکین په څېر معتبرو شرکتونو حضور به د نوي کابل ښار په تطبیق کې د سرعت، کیفیت او دوامدار پرمختګ سبب وګرځي.
