علماء دې په شعبو او څانګو نه وېشل کېږي، کنه ټولنه فاسدېږي
۱۴۴۶/۱۱/۳
د کور او ښار جوړولو وزارت محترم سرپرست وزیر الحاج شیخ حمدالله نعماني، د جوزجان ولایت په خواجه دوکوه ولسوالۍ کې د دارالعلوم له استادانو او طالبانو سره ناسته وکړه.
د کور او ښار جوړولو وزارت محترم سرپرست وزیر الحاج شیخ حمدالله نعماني د یاد دارالعلوم علماء کرامو او طالبانو ته په خطاب کې وویل، تاسې ته ستر مسؤلیت متوجه دی، چې د الله دین به زده کوئ او نورو ته به یې رسوئ.
ښاغلي شیخ حمدالله نعماني وویل، د الله په لاره کې د علم زده کړې لپاره نیتونه پاک کړئ چې په دغه لاره کې به له سختو ستونزو سره مخامخ شئ، خو باید استقامت ولرئ.
محترم نعماني وویل، دا دنیا باید ستراتېژیکه اړتیا ونه ګرځول شي، بلکې علم ته کار وشي، ځکه چې دلته تر ډېره د علم او عرفان عظمت وژل شوی دی په افغانستان کې علم او ټکنالوجۍ ته ستر زیان رسېدلی دی.
نوموړي دشتې لیلې ته په اشارې وویل، دلته او بلکې په ټول افغانستان کې د عالمانو او طالبانو وینې بهیدلې دي او دا په دې معنا چې هغوی غوښتل خلکو ته دین ورسوي.
هغه طالبانو او عالمانو ته په خطاب کې وویل، ټولنه تاسې ته اړتیا لري، ځکه په خبره یې د اشغال له امله دا ټولنه تر یو بریده مفسده شوې وه، چې اصلاح یې له عالمانو پرته ناشونې ده.
محترم شیخ حمدالله نعماني وویل، د اسلام دین ته باید د کامل دین په سترګه وکتل شي، علماء په شعبو او څانګو ونه وېشل شي، کنه ټولنه فاسدېږي.
ښاغلي نعماني د خپلو خبرو په دوام وویل، علماء باید د دین ټولې شعبې په پام کې ونیسي، وحدت ولري او د تعصبي مسایلو څخه ډډه وکړي.
په پای کې د مدرسې مهتمم او مشر استاد له نوموړي مننه وکړه او خپل ځینې تألیف شوي کتابونه یې ورته ډالۍ کړل.
