له کمې اندازې ځمکې څخه د سترې ګټې اخیستنې په موخه به زده کړې پیل شي
۱۴۴۶/۰۳/۲۱
د کور او ښار جوړولو وزارت د ښاري او مسکن انستېتوت امریت په پام کې لري چې د دغه وزارت یو شمېر کار کوونکو ته د ځمکې د تنظیم برخه کې روزنیزه برنامه ترسره کړي.
یاد امریت هوډ لري چې له کمې اندازې ځمکې څخه د سترې او سمې ګټې اخیستنې په موخه دغه روزنیزه برنامه عملي کړي، چې له مخې به یې د پام وړ پرمختګ رامنځته شي.
په هغه پرزنټېشن کې چې په همدې موخه دایر شوی و او د کور او ښار جوړولو وزارت محترم سرپرست وزیر الحاج شیخ حمدالله نعماني ته یې معلومات ورکول، یادونه وشوه، چې دغه برنامه اغېزمنه او ګټوره ده.
د معلوماتو د ورکړې په مهال محترم سرپرست وزیر وویل، لازمه ده چې په دغه برنامه کې د ځمکې اړوند ټول تخنیکي او حقوقي اړخونه په پام کې ونیول شي او پر داسې لارو چارو غور وشي چې د ښار او مسکن برخه کې ګتور ثابت شي.
تمه ده، چې د یادې برنامې په پلي کېدا سره به د وزارت کاري ظرفیت لا لوړ او د ښاري او مسکن برخو کې به ستر کارونه ترسره شي.
د کور او ښار جوړلوو وزارت هڅې پیل کړي، چې څنګه کېدای شي له کمې اندازې ځمکې څخه ستره او لازمه ګته پورته شي او د ښاري او مسکن برخو کې په زړه پورې خدمات ترسره شي.
مناسبې سرپناه ته کم لاسرسی هغه ستونزه ده چې ډېر شمېر افغانان ورسره لاس او ګرېوان دي او دغه وزارت یې د حل برخه کې نه ستړې کېډونکې هلې ځلې کوي.
