د نیمروز ولایت منطقوي پراختیايي پلان منظور شو

ښار جوړولو او ځمکو وزارت سرپرست وزیر محترم محمود کرزی د نیمروز له والي محترم پوهندوی سید ولی سلطان، په ولسي جرګه کې د خلکو استازو محترم ګل احمد نور زاد او محترمه فریده حمیدي او د نیمروز ولایتي شورا مرستیال محترم حاجی نعمت الله صدیقي سره په کتنه کې د یاد ولایت منطقوي پراختیايي پلان منظور کړ.

په سر کې، د ښاري چارو مرستیال محترم روښان ولسمل د نیمروز ولایت منطقوي پراختیايي پلان د ترتیب په څرنګوالي خبرې وکړې او زیاته یې کړه چې یاد پلان د جلالتماب جمهور رئیس د لارښوونې او په یاد ولایت کې د کره ارزونې او مطالعاتو په نتیجه کې د نیمروز ولایت د منظم انکشاف لپاره د یو لید لوري په توګه جوړ شوی دی.

ورپسې، د ښار جوړولو او ځمکو وزارت سرپرست وزیر محترم محمود کرزی د یاد منطقوي پراختیايي پلان ترتیب او منظوري یې د نیمروز ولایت د منظم انکشاف، په یاد ولایت کې د انکشافي او ټولګټو پروژو د تطبیق لپاره د فرصت برابرولو او د خلکو د هوساینې او اقتصادي ودې په برخه کې خورا مهم او ارزښتناک وباله.

همدارنګه، د نیمروز والي او په ولسي جرګه کې د خلکو استازو د یاد ولایت منطقوي پراختیايي پلان منظوري یې د نیمروز ولایت د ودې او انکشاف لپاره خورا اړین وباله او په دې تړاو د ښار جوړولو او ځمکو وزارت د مشرتابه له پاملرنې او هر اړخیزې همکارۍ څخه مننه وکړه.

د غونډې په پای کې، د نیمروز ولایت منطقوي پراختیایي پلان د ښار جوړولو او ځمکو وزارت سرپرست وزیر او د نمیروز والي له لوري په ولسي جرګه کې د خلکو د استازو په حضور کې لاسلیک او منظور شو.

###