پلان انکشاف منطقوی ولایت نیمروز منظور شد

محترم محمود کرزی سرپرست وزارت شهرسازی و اراضی در دیدار با محترم پوهندوی سید ولی سلطان والی نیمروز، محترم گل احمد نور زاد و محترمه فریده حمیدی نماینده نماینده های مردم نیمروز در ولسی جرگه و حاجی نعمت الله صدیقی معاون شورای ولایتی نیمروز،  پلان انکشاف منطقوی این ولایت را منظور کرد.

ابتدا، محترم روشان ولسمل معین امور شهرسازی راجع به چگونگی ترتیب پلان منطقوی ولایت نیمروز معلومات داده افزود که حسب هدایت رهنمودی جلالتمآب رئیس جمهور کشور این پلان در نتیجه مطالعات همه جانبه ترتیب و به حیث یک دور نما برای انکشاف منظم ولایت نیمروز ترتیب گردیده است.

متعاقباً، محترم محمود کرزی سرپرست وزارت شهرسازی و اراضی ترتیب و منظوری پلان منطقوی را گام مهم و حیاتی در عرصه انکشاف منظم ولایت نیمروز، زمینه سازی برای تحقق پروژه های انکشافی و عام المنفعه و فراهم ساختن شرایط بهتر رفاه و آسایش مردم و رشد اقتصادی تلقی نمود.

به همین ترتیب، والی و نماینده های مردم ولایت نیمروز منظوری پلان منطقوی را گام بسا مهم و حایز اهمیت برای انکشاف ولایت نیمروز دانسته و از توجه مزید و همکاری همه جانبه وزارت شهرسازی و اراضی اظهار سپاس و قدر دانی نمودند.

در فرجام، پلان انکشاف منطقوی ولایت نیمروز از سوی محترم محمود کرزی سرپرست وزارت شهرسازی و اراضی و محترم پوهندوی سید ولی سلطان والی نیمروز در حضور نماینده مردم آن ولایت منظور گردید.

###