ښار جوړولو او ځمکو وزارت مشرتابه په تېره یوه میاشت کې ۱۶ انکشافي پلانونو منظور کړي دي
ښار جوړولو او ځمکو وزارت مشرتابه د دولتي ځمکو د تنظیم او مدیریت او ښاري پراختیا په برخه کې د کړنو په دوام، په تېره یوه میاشت کې ۱۶ انکشافي پلانونه (پنځه تفصیلي پلانونه، څلور استراتيژیک پلانونه، دوه منطقوي پلانونه او پنځه د بهسازۍ پلانونه) منظور کړي دي.
په تفصیلي پلانونو کې د کابل ولایت د شکردرې ولسوالۍ د غالۍ اوبدونکو ښارګوټي تفصیلي پلان، د ننګرهار ولایت د رودات ولسوالۍ او بحر آباد د ښوونکو د ښارګوټو تفصیلي پلانونه، د لوګر ولایت د پل علم ښوونکو د ښارګوټي تفصیلي پلان او په فراه ولایت کې د زرو کورنیو د استطاعت وړ ښارګوټي تفصیلي پلان شامل دي. د دې پلانونو په تطبیق او د یاد ښارګوټو په جوړېدو سره به په یادو ولایتونو کې نږدې ۱۵ زره کورنیو ته په مستقیمه توګه د استوګنې زمینه برابره شي.
همداراز، په تېره یوه میاشت کې، څلور استراتیژیک پلانونه چې یو یې د جوزجان مرکز شبرغان ښار او درې نور يې د بامیان ولایت د ورس، سیغان او یکه ولنګ ولسوالیو لپاره ترتیب شوي منظور شول. سربېره پردې، د ارزګان او نیمروز ولایتونو منطقوي پلانونه د ښار جوړولو او ځمکو وزارت مشرتابه له لوري منظور شول.
یاد استراتیژیک او منطقوي پلانونه د اوږد مهاله لید لوري په ټوګه، د یاد ولایتونو د منظم انکشاف، ټولګټو او انکشافي پروژو د تطبیق او د حکومت پراختیایي او اقتصادي پالیسیو او پلانګذاریو د تطبیق لپاره د دولتي ځمکو څخه د سمې او معقولې استفادې لپاره لاره هواروي.
په همدې ترتیب، په تېره یوه میاشت کې، د فاریاب، سرپل، سمنګان او پروان ولایتونو لپاره پنځه د بهسازۍ پلانونه منظور شول. ښارجوړولو او ځمکو وزارت د غیر رسمي سیمو د ثبت سربېره، د ښاري سکټور اداراتو سره په همغږۍ د بهسازۍ د پلانونو د ترتیب او منظورۍ او همدارنګه د احیای مجدد پروژو د تطبیق له لارې هڅه کوي ترڅو غیر رسمي سیمې په ښو استوګنیزو سیمو بدل کړي ترڅو هېوادوالو ته ښاري خدمتونو وړاندې او د رسمي او غیر رسيمي سیمو ترمنځ توپیر له منځه لاړ شي.
ښار جوړولو او ځمکو وزارت د افغانستان اسلامی جمهوري دولت د پالیسیو سره سم د دولتي ځمکو د تنظیم او مدیریت او ښاری پراختیا له لاري، د ټولګټو پروژو د تطبیق لپاره د دولتي ځمکو څخه د سمې او معقوله استفادې چې پایله یې د خلکو هوساینه او اقتصادي وده ده، زمینه برابروي.
###
