پکتیکا ولایت کې د کور او ښار جوړولو وزارت پلانونو میلیونونو ډالرو پانګونې ته زمینه برابره کړه
۱۴۴۶/۰۹/۰۸
پکتیکا ولایت کې د کور او ښار جوړولو ریاست محترم رئیس مولوي محمد طاهر سیف الجهاد وایي، د وزارت اصلاحي او تفصیلي پلان د شاوخوا شپږ (۶) میلیونه ډالرو په ارزښت پانګونې ته زمینه برابره کړه.
ښاغلی مولوي سیف الـجهاد وایي، دا چې پخواني پلان د معیار او اړینو ښاري اسانتیاوو د رامنځته کولو ظرفیت نه درلود، نو په همدې موخه یې د ولایت محترم مقام او د ښرنې ښاروالۍ د محترم ریاست په همکارۍ هڅې پیل کړې چې، نوی پراختیایي اصلاحي پلان جوړ او منظور کړي چې، په خبره یې دغه پلان به وکولای شي د خلکو او د یو معیاري ښار اړتیاوې او غوښتنې پوره کړي.
د معلوماو له مخې، په یاد منظور شوي اصلاحي پراختیایي او تفصیلي پلان کې (۲۱۶) مارکېټونه، (۸) فرعي سړکونه، مسجدونه، ښاري تشنابونه، د اوبو ذخیرې، معیاري کانالیزاسیون سیستم او نورې ټولې اړينې ښاري اسانتیاوې شاملې دي.
په سیمه کې پانګوالو د نوي پلان د منظورېدو سره سم ډاډ ورکړی چې، خپلې پانګې به د خپل ښار د پراختیا او ودې په موخه وکاروي.
د کور او ښار جوړولو وزارت د پلانونو له مخې، په هېواد کې منظمې، اغېزمنې او ګټورې پانګونې ته زمینه برابروي او د غیر پلاني پراختیا مخنیوی کوي.
