په کابل کې د عزیزي کمپلکس په اړه چمتو شوی راپور له ریاسة الوزرا محترم عالي مقام سره شریک شو
۱۴۴۶/۳/۲۲
د کور او ښار جوړولو وزارت د محترم سرپرست وزیر الحاج شیخ حمدالله نعماني په مشرۍ ، کابل کې د عزیزي کمپلیکس جوړولو کمېټې خپله وروستۍ ناسته وکړه.
په دغه ناسته کې، د کور او ښار جوړولو وزارت د محترم سرپرست وزیر الحاج شیخ حمدالله نعماني په مشرۍ، د عامې روغتیا محترم وزارت، د کار او ټولنیزو چارو محترم وزارت، د کرنې، اوبو لګولو او مالدارۍ محترم وزارت او د کابل محترمې ښاروالۍ استازو برخه اخیستې وه.
د یادې موضوع په تړاو په تیرو ناستو کې، د کور او ښار جوړولو وزارت محترم سرپرست وزیر ، د کور او ښار جوړولو وزارت، د کابل ښاروالۍ او د اراضۍ له محترمو استازو یو ګډ هئیت ته دنده سپارلې وه، تر څو ساحه له نږدې وګوري او د ځمکې تفکیک او تثبیت وکړي.
بالاخره، د څو پرلپسې ناستو، اسنادو کتلو او نورو هڅو وروسته ټاکل شوي هیئت خپلې موندنې د یو راپور په اډانه کې چمتو او د ا.ا.ا د ریاسة الوزرا محترم عالي مقام ته وسپاره.
د عزیزي خیریه بنسټ، په پام کې لري چې د کابل ښار، اتمې ناحیې، رحمن مېنې په شاوخوا (۳۵۰) درې سوه او پنځوس جریبه ځمکه کې پوهنتون، روغتون، دارالایتام، ښوونځي، لیلیه او هستوګنیزه ساحه، جوړه کړي، چې په وړیا توګه به خدمات ترسره کوي.
