په وروستي یو کال کې څه باندې څلور نیم مېلیونه جریبه دولتي ځمکه ثبت شوه
د ښار جوړولو او ځمکو وزارت د دولتي ځمکو بانک برنامې له لارې په وروستي یو کال په ۲۸ ولایتونو کې څلور مېلیونه اووه سوه زره جریبه دولتي ځمکه سروې او په سیسټم کې ثبت کړې ده.
له دې ارقامو څخه ۳۷۰ زره جریبه په ننګرهار، ۲۳۸ زره جریبه په نیمروز، ۲۳۵ زره جریبه په کابل، ۲۳۰ زره جریبه په بلخ، ۲۱۷ زره جریبه په پکتیا، ۲۰۰ زره جریبه په کندز، ۱۹۸ زره جریبه په کندهار، ۱۹۴ زره جریبه په هرات او پاتې نوره ځمکه په شلو ولایتونو کې سروې او ثبت شوې ده.
د ښار جوړولو او ځمکو وزارت په دې توګه د دولتي ځمکو له بانک څخه د ګټنې په لړ کې تر اوسه د ځمکو اړمنو دولتي ادارو ته په ۲۰ ولایتونو کې ۱۸۹۵۳ جریبه ځمکه انتقال کړې ده. همدا رنګه په کابل، هرات، ننګرهار او لوګر کې پر راستنېدونکیو، کورنیو بې ځایه شویو، د امنیتي او دفاعي ځواکونو شهیدو منسوبینو کورنیو، د یادو ځواکونو برحاله منسوبینو او ښوونکیو باندې ۲۰ زره استوګنیزې نمرې وېشلې ده.
د ښار جوړولو او ځمکو وزارت ژمن دی چې د دولتي ځمکو بانک له لارې ټولې ځمکې او د دولت تر استفادې لاندې عامه ملکیتونه ثبت او له هغو د سمې استفادې لپاره د زمینې برابرولو ترڅنګ د غصب مخه هم ونیسي.
د دولتي ځمکو بانک برنامې عملي چارې په ۲۸ ولایتونو کې د افغانستان د ځمکوالۍ چارو تنظیم قانون د یوولسمې او دولسمې مادو او د جمهوري ریاست عالي مقام د (۶۶) حکم په رڼا کې روانې دي.
