په هرات کې د تاریخي جامع مسجد د بیارغونې چارو تخنیکي څارنه تر سره شوه
۱۴۴۶/۱۱/۱۹
د هرات ولایت د کور او ښار جوړولو ریاست د تخنیکي ټیم له خوا د دې ولایت د ستر تاریخي جامع مسجد شریف د بیارغونې له روانو چارو څارنه تر سره شوه.
د یاد ریاست محترم رئیس، انجنیر عبدالله اکبري وایي، د یاد مسجد د هغو برخو ترمیم دوام لري، چې د ۱۴۰۲ کال د شدیدې زلزلې له امله سخت زیانمنې شوې وې.
ښاغلی انجنیر اکبري وایي، پدې بیارغونه کې د پخوانیو خونو ګچکاري، د تخریب شوو خښتو ترمیم، او د نورو زلزلهځپلو برخو رغنیزې چارې شاملې دي.
د هرات جامع مسجد، چې د اسلامي تمدن او افغاني معمارۍ یو ارزښتناک تاریخي اثر او دغه راز د هېواد د فرهنګي میراث مهمه برخه ګڼل کېږي، بیارغونه یې نه یوازې د یوه تاریخي هویت د ژغورنې هڅه ده، بلکې د فرهنګي ارزښتونو د خوندي کولو لپاره یو بنسټیز ګام هم دی.
د کور او ښار جوړولو ریاست مسؤلین ډاډ ورکوي چې رغنیزې چارې د مسلکي انجنیرانو تر نظارت لاندې، د اصلي معمارۍ او تاریخي ارزښت د ساتنې په پام کې نیولو سره ترسره کېږي
