په نوي کابل ښار کې د نوې پانګونې تمه
۱۴۴۶/۰۳/۲۱
د کور او ښار جوړولو وزارت محترم سرپرست وزیر الحاج شیخ حمدالله نعماني، په خپل کاري دفتر کې له یو شمېر ملي پانګوالو سره وکتل او په نوي کابل ښار کې د پانګونې په اړه یې هر اړخیزې خبرې وکړې.
ملي پانګوالو وویل، دلته راغلي کسان د بېلا بېلو مهمو کمپینو مشران او استازي دي چې هوډ لري د نوي کابل ښار په برخو او په ځانګړې توګه پیروزي ښارګوټي کې پانګونه وکړي.
د کور او ښار جوړولو وزارت محترم سرپرست وزیر الحاج شیخ حمدالله نعماني، راغلو پانګوالو ته په نوي کابل ښار او پېروزي ښارګوټي کې د پانګونې په تړاو هر اړخیز معلومات وړاندې کړل، اسانتیاوې او فرصتونه یې ورته روښانه کړل.
ښاغلي وزیر له پانګوالو غوښتنه وکړه، چې لومړی دې ساحه له نږدې وګوري، هلته د موجوده ودانیزو شرکتونو له مسؤلینو سره دې خبرې وکړي او له هر اړخیز تحلیل وروسته دې وزارت ته مراجعه وکړي.
پانګوالو یادونه وکړه، چې له ساحې او نورو شرکتونو سره تر کتنې وروسته به خپل وړاندیزونه د وزارت محترم مقام ته وړاندې کړي او د توافق په صورت کې به پر عملي چارو لاس پورې کړي.
