په فراه ولایت کې د ګډوالو د ښار ګوټي لپاره ځمکه مشحص شوه
۱۴۴۶/۵/۱
د فراه ولایت د کور او ښار جوړولو ریاست محترم رئیس الحاج مولوي نصرالله استقلال وایي، د یو ګډ هئیت په شتون کې یې د کډوالو او بیرته را ستنیدونکو لپاره د ښار ګوټي د جوړیدو په موخه د ځینو ساحو څخه لیدنه وکړه.
ښاغلي مولوي استقلال وویل، په دغه پلاوي کې د استخباراتو، د اوبو لګولو، د اوبو رسونې تخنیکي آمر، د چاپېریال ساتنې استازی، د کرنې او مالدارۍ رئیس، د فراه ښاروال او د کلیو د پراختیا رئیس هم شامل وو.
د نوموړي په خبره، پلاوي په دې سفر کې د کډوالو لپاره د مناسبې ځمکې د ټاکلو په موخه د ساحې وضعیت او سرچينې، په ځانګړې توګه د اوبو رسونې، زراعت او چاپیریال ساتنې اړوند، وڅیړل.
په پایله کې د ګډ هئیت په شتون کې خواوشا (۳۰۰۰) جریبه ځمکه د اړوندو ادارو د تخنیکي ټیم لخوا د کډوالو د هستوګنې او د ژوند د لومړنیو اړتیاو د پوره کولو لپاره ځانکړې شوه.
