په استانبول کې د افغانستان د پنځو ښارونو د پراختيا لپاره پنځه وځنی ورکشاپ پای ته ورسېد
په استانبول کې د کندهار، هرات، مزار شريف، جلال اباد او خوست ښارونو د ستراتيژيکې پراختيا چهارچوب هغه پنځه ورځنی ورکشاپ چې د ښار جوړولو او ځمکو وزارت سرپرست محترم محمد جواد پيکار، د سوداګرۍ او صنايعو وزارت سرپرست محترم اجمل احمدي، د سيمهييزو ارګانونو د خپلواکې ادارې د ښارواليو چارو معين محترم عبدالباقي پوپل، د نړيوال بانک، ساساکي کمپنۍ او د بشري اسکانو لپاره د جنوبي کوريا د انسټيټيوټ استازو په ګډون جوړ شوی و؛ پای ته ورسېد.
د دې ورکشاپ په لومړۍ ورځ د ستراتيژيک انکشاف د چهارچوب پېژندنې، د نفوسو زياتوالي او د ښارونو پراختيا، د ښارونو پراختيا او محرکه قواوو، د کورنيو بې ځايه شويو وضعيت، د ښاري اساساتو او ساختارونو، د اقتصادي تحليل، د سرچينو تحليل او چاپېريال ساتنې، د حکومتولۍ، د دولتي ادارو او تاريخي ابداتو په اړه مفصل راپور وړاندې شو او د پنځو ښارونو د ستراتيژيک انکشاف د چهارچوب لپاره د بيس لاين راپور منظور شو.
په دويمه ورځ د برسۍ په ګډون د ښاري انکشاف اساسي عوامل تائيد شول، اطلاعاتو او د ساساکي کمپنۍ لهخوا برابر شويو موادو ته د باور ورکوونې راپورونه وړاندې شول او د افغانستان ښاري سکتور د رهبرۍ لهخوا د پروژو اولويت بندۍ چهارچوب هم منظور شو.
د ورکشاپ په درېيمه ورځ د ښارونو پر ترکيبي مسودې د تفصيلي بحث په ګډون د پنځو ښارونو پلان جوړونې د چهارچوب مسوده په پرنسيب کې تائيد شوه.
په همدې ورځ د افغانستان اسلامي جمهوري دولت جلالتماب جمهور رئيس محمد اشرف غني د ويډيو کنفرانس له لارې په دې ورکشاپ کې ګډون وکړ. جلالتماب جمهور رئيس د ښاري ژوند پر اړتياو، د ښاري معمارۍ پر معيارونو، د اوسېدو وړ مسکن، د اوبو سرچينو او پر ښاري زيربناو د ټينګار تر څنګ وويل د ستراتيژيک انکشاف په چهارچوب کې پاسني موارد د يو اصل په توګه شامل دي.
د ياد ورکشاپ په څلورمه ورځ د پاسنيو ښارونو د ترکيب راپور پر مسودې د بحث تر څنګ پر ملي فضايي ستراتيژۍ هم مفصلې خبرې وشوې.
د ورکشاپ په وروستۍ ورځ د هرات، مزار شريف، جلال اباد، کندهار او خوست ښارونو د ستراتيژيک انکشاف د چهارچوب لپاره د ساساکي شرکت لهخوا د ظرفيت جوړونې پر نهو موډولونو موافقه وشوه.
د يادولو وړ ده چې د ښار جوړولو او ځمکو وزارت له ساساکي کمپنۍ او نړيوال بانک سره په همکارۍ د هرات، مزار شريف، کندهار، جلال اباد او خوست ښارونو لپاره د ستراتيژيک انکشاف د چهارچوب عملي چارې پيل کړي چې په بشپړېدو سره به يې اوسنۍ نيمګړتياوې لهمنځه ولاړې شي.
