هلمند کې د یتیمو کورنیو لپاره د ښارګوټي د عملي چارو په چټکتیا خبرې وشوې
۱۴۴۵/۱۱/۲۰
د کور او ښار جوړولو وزارت محترم سرپرست وزیر شیخ حمدالله نعماني، د هلمند ولایت په لښکرګاه ښار کې د یتیمو کورنیو لپاره د هستوګنیز ښارګوټي د قراردادي شرکت له مسؤل سره وکتل.
په دغه ناسته کې خبرې وشوې چې څنګه کېدای شي د یادې پروژې عملي چارې د معیار او کیفیت خونديتوب سره سره چټکې شي.
د یادې پروژې لپاره توپوګرافي سروې او تفصیلي پلان جوړ شوی، چې اصلاح ته اړتیا لري.
ښاغلي شیخ حمدالله نعماني د قراردادي شرکت مسؤل ته وویل، شته ستونزې به هوارې کړي، د ځمکې پلان او نقشه به ترتیب کړي او د وزارت اړوند چارې به ډېر ژر بشبړې کړي.
نوموړي له قراردادي شرکت مسؤل وغوښتل چې لومړی دې د یادې پروژې چې په پام کې ده په (۲۷۲) جریبه ځمکه کې جوړه شي، څلور دېواله راتاو کړي او په داخل کې دې په لومړنیو چارو اقدامات وکړي.
د قراردادي شرکت مسؤل وویل، چمتو دي چې د وزارت له حکم سره سم په ورسپارل شوو چارو عملي کارونه پیل کړي.
په پام کې ده، چې د پنځه سوه یتیمو کورنیو لپاره په هلمند کې هستوګنیز ښارګوټی جوړ شي، چې لګښت یې د قطر هېواد د الغرافه خیریه بنسټ له لوري ورکول کېږي.
