د مسکن، ودانیزو چارو او د برنامو د پراختیا معینیت اداري غونډه تر سره شوه
۲۵ / ۶ / ۱۴۴۷
د مسکن، ودانیزو چارو او د برنامو د پراختیا معینیت کاري او اداري غونډه، د محترم الحاج مولوي ګل زرین صابر په مشرۍ، د یاد معینیت د اړوندو ریاستونو د رئیسانو او آمرینو په حضور کې ترسره شوه.
د غونډې په پیل کې، محترم مرستیال د سپارل شویو مسؤلیتونو او دندو پر وخت ترسره کېدو باندې ټینګار وکړ او د اړوندو ریاستونو له لوري یې د کارکوونکو د کاري چارو منظم اوونیز او میاشتنۍ ارزونه ضروري وبلله.
محترم معین زیاته کړه چې ریاستونه باید خپل له پلان څخه بهر کاري راپورونه له معینیت سره شریک کړي او همدارنګه خپل کلنی کاري پلان، بودیجه، تشکیلات او اړتیاوې له سره وارزوي، تر څو وړتیاوې او کمزورۍ په دقیقه توګه وپېژندل شي.
محترم مولوي ګل زرین صابر همدارنګه یادونه وکړه چې ریاستونه باید د رسمي لیکنو او مقام ته د وړاندیزونو د وړاندې کولو پر مهال پوره پاملرنه وکړي او وړاندیز شوې موضوع ګانې په هر اړخیز ډول وڅېړي او وارزوي، تر څو پرېکړې او اجرات د کره او باوري معلوماتو پر بنسټ ترسره شي.
نوموړي په دوام کې د دې معینیت د ریاستونو ترمنځ د همکارۍ، همغږۍ او کاري یووالي پر پیاوړتیا ټینګار وکړ او دا یې د چارو د اغېزمن پرمخ بیولو او د پروګرامونو د ښه تطبیق لپاره مهم وبلل.
په دې غونډه کې، د اړوندو ریاستونو رئیسانو او آمرینو د کاري همغږۍ د تأمین ډاډ څرګند کړ او یو شمېر شته ستونزې، ننګونې او اړتیاوې یې مطرح کړې.
همدارنګه هغوی د اړتیاوو د تثبیت، پر تشکیلاتو د کار څرنګوالي او له پلان څخه بهر د کاري راپورونو د وړاندې کولو په برخه کې، د مسکن، ودانیزو چارو او د برنامو د پراختیا محترم مرستیال ته د بشپړې همکارۍ ډاډ ورکړ.
