هرات ولایت کې د تګ راتګ لارو د پراختیا په اړه طرحه جوړه شوه
۱۴۴۶/۰۹/۰۱
په هرات ښار کې د تګ راتګ لارو د پراختیا په تړاو جوړه شوې طرحه چې، د هرات ولایت محترم مقام له لوري هم ومنل شوه، په هرات کې د کور او ښار جوړولو محترم ریاست، د هرات ښاروالۍ محترم ریاست او د هرات پوهنتون په هڅو او همکاریو جوړه شوه.
هرات کې د کور او ښار جوړولو ریاست محترم رئیس انجنیر عبداالله اکبري وایي، یاده ستره طرحه د اړوندو تخنیکي او باتجربه متخصصینو له لوري تر هر اړخیزې څېړنې او مطالعاتو وروسته جوړه شوه.
ښاغلی انجنیر اکبري وایي، یاده طرحه د راتلونکو دېرش (۳۰) کالونو لپاره جوړه شوه چې، د تائید لپاره به پلازمېنې کابل ته د کور او ښار جوړولو وزارت محترم مقام ته ولېږل شي او له هغې وروسته به عملي شي.
نوموړی زیاتوي، په دغه پلان کې درې حلقوي سړکونه او له (۱۲) زیات نښلونکي سړکونه وړاندیز شوي دي چې، په ټوله کې د ښار په داخل او د دوه ولسوالیو انجیل او ګذره لپاره دوه سوه او پنځه دېرش (۲۳۵) کیلو متره سړک په پام کې نیول شوی دی.
محترم اکبري وویل، سړکونه ځینې یې تر دېرش (۳۰) مترو پلنوالي لري او ځینې هغه یې تر (۱۲۰) مترو پورې پلنوالی په پام کې نیول شوی دی.
ټاکل شوې چې، د دغه پلان او طرحې په تطبیق سره به هرات ښار کې شته د تګ راتګ ستونزې تر یو بریده حل او خلکو ته به ګڼې اسانتیاوې رامنځته شي.
