له سیلاب ځپلو کورنیو سره د مرستو راټولولو او د دوی ستونزو د رسېدو کمېټې بله ناسته وکړه
![picture](/sites/default/files/2024-05/2_5.jpeg)
۱۴۴۵/۱۱/۲۰
د کور او ښار جوړولو وزارت د محترم سرپرست وزیر شیخ حمدالله نعماني په مشرۍ، له سیلاب ځپلو سره د مرستو راټولولو کمېټې خپله دویمه ناسته وکړه، چې په کې پر مهمو موضوعاتو خبرې وشوې.
د ناستې په پل کې زیانمن شوو ولایتونو کې د شته وضعیت جاج واخیستل شو او په تېره ناسته کې د نیول شوو تصمیمونو عملي کېدا پر څرنګوالي خبرې وشوې.
ورپسې، د یادې کمېټې لپاره د عمل پر پلان خبرې وشوې، چې د ټولو ګدونوالو د تائید وړ وګرځېد.
د یوې تخنیکي کمېټې جوړول، د کاري لایحې ترتیب، د بانکي حسابونو پرانستل او معرفي کول، د لګښتونو لپاره پر منظم میکانیزم کار کول، د سروې د پیلولو لپاره د سیمو ځانګړي کول، د معلوماتو راټولولو په موخه د سروې ډیزاین او د سوالونو ترتیب، له اړوندو نورو ادارو سره همغږي کول، له سروې وروسته د عملي کارونو پیلول، د مسکن ډولونه ترتیبول، له مرستندویه بنسټونو او مؤسساتو سره ناسته کول او داسې نور موارد د یاد بحث مهم ټکي وو، چې بحثونه پرې وشول.
د کور او ښار جوړولو وزارت محترم سرپرست وزیر شیخ حمدالله نعماني ټینګار وکړ، چې د تخنیکي چارو د پرمختګ لپاره دې په اصلي کمېټه کې دخپل وزارتونه خپل وړ کسان ډېر ژر معرفي او په کار دې پیل وکړي.
تمه ده چې د یادې کمېټې چارې به ژر عملي بڼه پیدا او د هېوادوالو درد ته به دوا شي.