په غزني ولایت کې د ښاري سرغړونو د مخنیوي ټیم د ښار درېیم پلان له ساحو څخه لیدنه وکړه
۱۴۴۷/۰۵/۱۷
د کور او ښار جوړولو وزارت د ښاري سرغړونو ریاست محترم رئیس مولوي عبدالمنان حقاني وایي، د غزني ولایت د کور او ښار جوړولو ریاست د محترم رئیس مولوي نور ولي بلال متقي په لارښوونه، د ښاري سرغړونو د مخنیوي ټیم له لوري د غزني ښار د درېیم پلان له یو شمېر ساحو څخه د څار او نظارت لیدنه ترسره شوه.
ښاغلي مولوي متقي وویل، یاده لیدنه د ښاري نظم د ساتنې او د غیرقانوني جوړښتونو د مخنیوي په موخه ترسره شوې ده. د لیدنې پر مهال، تخنیکي ټیم د هغو ساحو وضعیت وارزاوه چې د ښاري اصولو خلاف جوړونې پکې رامنځته شوې وې او اړوندو مسوولینو ته لازمې لارښوونې وشوې.
همدارنګه د ښاري سرغړونو مخنیوي ریاست محترم رئیس مولوي عبدالمنان حقاني زیاتوي، د ښاري سرغړونو ریاست موخه دا ده چې د هېواد په ټولو ښارونو کې د ښار جوړولو نقشې، اصول او قانوني معیارونه عملي شي او د بې نقشې ودانیو او سرغړونو مخه ونیول شي.
د کور او ښار جوړولو وزارت د ښاري نظم او معیاري جوړولو د پلي کولو په موخه په بېلابېلو ولایتونو کې د سرغړونو د مخنیوي ځانګړي ټیمونه ګومارلي دي، څو ښاري فضا منظم او د پایدارې ودې لپاره معیاري چاپېریال رامنځته کړي.
