شبرغان کې ښاري تخلفات په نښه او د له منځه وړلو لپاره یې هڅې پیل شوې

۱۴۴۶/۰۶/ ۲۴

د کور او ښار جوړولو وزارت د ښاري تخلفاتو د مخنیوي ریاست محترم رئیس مولوي عبالمنان حقاني وایي، د ریاست اړوند تخنیکي او مسلکي ټیم یې د شبرغان ښار له محترم ښاروال او د یادې ښاروالۍ د تخنیکي او مسلکي خدماتو مدیریت له محترم مسؤلینو سره ناسته وکړه.

ښاغلی مولوي حقاني وایي، د تخنیکي ټیم د پلټنو په مهال یې معلومه شوه، چې خپله د شبرغان ښاروالۍ په ځینو برخو کې د پلان خلاف چارې ترسره کړي دي.

نوموړی وایي، څو بېلا بېل ریاستونه د تفصیلي پلان له مخې په شنه ساحه کې جوړ شوي او په خبره یې دغه ځمکې د ښاروالۍ له لوري پلورل شوې دي.

دغه راز، په(L)  پروژه کې درې نمرې (۵۸۸)، (۵۸۹) او (۵۹۰) یمه نمره د پلان له مخې ریزرفې ساحه ده، خو پرته له دې چې د کور او ښار جوړولو ریاست یې سکېچ او تعدیل کړي، د ښاروالۍ له لوري پر اشخاصو پلورل شوې دي.

بل هغه یې دا ده چې، په(H)  پروژه کې شنه ساحه د ښاروالۍ له لوري په خپل سر استوګنې ساحې ته تعدیل او سکېچ شوې او بیا یې پر اشخاصو پلورلې ده.

پورته ذکر شوې سرغړونې خپله دشبرغان له محترمې ښاروالۍ سره شریکې شوي او هوکړه شوې چې د مخنیوي لپاره به یې لاس په کار شي.