راتلونکي لیدلوري، پلانونو، ننګونو او فرصتونو باندې خبرې وشوې
۱۴۴۷/۱/۱۷
د کور او ښار جوړولو وزارت د محترم سرپرست وزیر الحاج مولوي نجیب الله حیات حقاني په مشرۍ ، د دغه وزارت د مرستیالانو، رئیسانو او چارسمبالو په ګډون مهمه ناسته ترسره شوه.
دغه ناسته، چې د کور او ښار جوړولو وزارت د راتلونکي لیدلوري، پلانونو، ننګونو او فرصتونو په تړاو جوړه شوې وه، په کې د غونډې ګډونوالو خپل نظریات او وړاندیزونه شریک کړل.
د دغه وزارت د ښاري چارو محترم مرستیال شیخ مدارعلي کریمي بامیاني، د ښاري پراختیا، نظم، د پلانونو تطبیق، او د ښاري خدماتو د ښه والي په برخه کې د وزارت مهم فعالیتونه او لید لوری بیان کړ.
نوموړي د چارو د لا پرمختګ په موخه ځینې وړاندیزونه هم وړاندې کړل.
ورپسې د د کور او ښار جوړولو وزارت محترم مالي او اداري مرستیال الحاج محمد ارسلاح خروټي د وزارت د اداري چارو، مالي شفافیت، او استخدام میکانېزمونو په اړه خبرې وکړې او د موجودو ادارې ستونزو حل، د سرچینو د اغېزمنې کارونې، ظرفیت لوړولو او یو شمېر نورو مهمو اصلاحاتو وړاندیزونه شریک کړل.
د رئیسانو او تخنیکي پرسونل نظرونه هم شریک او د لا اغېزمنتیا په موخه یې دلایل واورېدل شول.
د غونډې په پای کې، د کور او ښار جوړولو وزارت محترم سرپرست وزیر الحاج مولوي نجیبالله حیات حقاني ارزښتناکې خبرې وکړې، چې اسلامي نظام، اسلامي ټولنې او هېواد ته په خدمت کولو ورټولې وې.
د کار کوونکو ترمنځ د همغږۍ لا زیاتوالی، ریښتینولي، د نیت پاکوالی، اخلاص، اطاعت، له فساد سره جدي مبارزه، ژمنتیا او داسې نور هغه موارد وو، چې ټینګار یې پرې وکړ.
ښاغلي وزیر حقاني وویل، ښاري وده او پراختیا، مسکن او اسانتیاوې د انسانانو اړتیا ده چې باید دغه وزارت یې په ترلاسه کولو کې خپلې هڅې لا ګړندۍ کړي.
نوموړي وویل، دی مسؤل دی او له مسؤلینو سره ناست دی، چې د هرې برخې پوښتنه به کوي.
ښاغلي الحاج مولوي نجیب الله حیات حقاني د وزارت کار کوونکو ته په خطاب کې وویل، ټولې چارې به مسؤلانه سرته رسوئ، د نوي کابل ښار او په ټوله کې د مسکن پروژو ته په پاملرنه زیاتوئ.
