د کور او ښار جوړولو وزیر په کابل کې د هوت خېلو له سپین ږیرو او علماؤ سره وکتل

14/3/1446

د کور او ښار جوړولو وزارت محترم سرپرست وزیر الحاج شیخ حمدالله نعماني، په کابل کې د هوت خېلو له سپین ږیرو او علماء کرامو سره وکتل او پر یو لړ ښاري او مسکن موضوعاتو یې خبرې وکړې.

په دغه کتنه کې، د هوت خېلو سپین ږیرو او علماؤ په خپله سیمه کې د ښاري وضعیت، مسکن او ځمکې په تړاو د شته ستونزو یادونه وکړه او د حل برخه کې یې د همکارۍ غوښتنه وکړه.

راغلو علماؤ او سپین ږیرو وویل، غواړي د دوی په پلرنۍ مورثي ځمکه کې منظم ښارګوټی جوړ او ګټه ترې واخلي.

دوی وایي، له لسګونو کلونو راهیسې د کابل په نهمه ناحیه کې ژوند کوي، پلرنۍ ځمکې لري، چې په تېره شل کلنه دوره کې یې د بېلا بېلو غاصبینو له برید ژغورلي هم دي، خو دا چې اوس یې نفوس مخ پر ودې دی، نو په وینا یې اړتیا ده چې په ښاري چوکاټ کې داخل منظم ښارګوټی جوړ او په کې د ژوند کولو بهیر ته دوام ورکړي.

راغلو کسانو یادونه وکړه، چې د ښارګوټي په اړه تر پام لاندې ځمکې اسناد لري او چمتو دي چې د تصفیې کمېسیون له لوري یې ځمکه تصفیه او بیا پرې د کور او ښار جوړولو وزارت له لوري منظم ښارګوټی جوړ شي.

په ناسته کې، یادونه وشوه چې اوسمهال د مسکن کمښت د هېواد په کچه یوه ستره ستونزه ده چې د حل لپاره یې امارت او ولس په ګډه همکار شي، ترڅو هېوادوالو ته مناسبه سرپناه برابره شي.

د کور او ښار جوړولو وزارت محترم سرپرست وزیر الحاج شیخ حمدالله نعماني، راغلو سپین ږیرو او علماء کرامو ته د ښه راغلاست ترڅنګ د شته ستونزو د حل په موخه لازمې لارښوونې او سپارښتنې وکړې.

ښاغلي سرپرست وزیر وویل، لومړی باید د ځمکې د ملکیت خبره روښانه شي او له هغې وروسته به د پلان مطابق د ښارګوټي نقشه او نورې چارې تر نظر لاندې ونیول شي.

د کور او ښار جوړولو وزارت هڅې پیل کړي، چې د هېواد په کچه د مسکن کمښت ستونزه حل او هېوادوالو ته د اسلامي او افغاني دودونو سره سم مناسبه سرپناه برابره کړي.