د کور او ښار جوړولو وزیر د ننګرهار ولایت د شینوارو د قومي مشرانو سره وکتل
۲۵/۰۶/۱۴۴۷
د کور او ښار جوړلو وزیر محترم الحاج مولوي نجیبالله حیات حقاني، په خپل کاري دفتر کې د ننګرهار ولایت د ډکې سیمې د شینوارو د قومي مشرانو سره وکتل.
په دې لیدنه کې لومړی د شینوارو قومي مشرانو د تورخم بازار د انتقال په اړه خبرې وکړې، ځکه چې د دوی د سیمې ځینې برخې د ښاري پلان له مخې د بازار تر ساحې لاندې راځي، هغوی خپلې عرایضې وړاندې کړې او د دې ستونزو د حل غوښتنه یې وکړه.
محترم الحاج مولوي نجیبالله حیات حقاني وویل، چې د ځمکو د تصفیې په برخه کې د ځمکو د غصب مخنیوي کمېسیون په ټول هېواد کې فعالیت کوي، دا موضوع به هم هماغه کمېسیون ته وسپارل شي، او تاسې باید خپل اسناد او مدارک یاد کمېسیون ته وسپارئ.
د کور او ښار جوړلو وزیر د ښاري چارو او د ښارونو د ښه والي په بېلابېلو برخو کې لازمې لارښوونې وکړې او زیاته یې کړه، چې خلک هم باید د منظم ښاري پراختیا لپاره له اسلامي امارت سره لازمه همکاري وکړي، تر څو د هغوی ژوند او اقتصاد وده او پرمختګ وکړي.
محترم الحاج مولوي نجیبالله حیات حقاني همدارنګه وویل، چې د خلکو د ستونزو د حل لپاره به له اړوندو ادارو سره هم خبرې وکړي.
