د کور او ښار جوړولو وزارت سرپرست وزیرد مسکن معینیت له بېلابېلو څانګو لیدنه وکړه
۱۴۴۷/۰۲/۱۲
د کور او ښار جوړولو وزارت محترم سرپرست وزیرالحاج مولوي نجیبالله حیات حقاني د مسکن، ودانیزو چارو او برنامو د پراختیا معین محترم مولوي گل زرین صابر او د یو شمېر رئیسانو په ملتیا، د یاد معینیت له یو شمېر اداري ریاستونو او کاري څانګو څخه لیدنه وکړه.
په دې لیدنه کې محترم سرپرست وزیر ټینګار وکړ، چې اداري چارې باید پر خپل وخت ترسره شي، او ورځنۍ مسؤلیتونو ته دې په اغېزمن ډول رسېدنه وشي، نوموړي له ټولو رئیسانو او کارکوونکو وغوښتل چې خپلې سپارل شوې دندې د صداقت، امانت دارۍ او مکلفیت پر بنسټ پر خپل وخت ترسره کړي.
همداراز، محترم مولوي نجیبالله حیات حقاني د ریاستونو او کارکوونکو ترمنځ د لا ښه همغږۍ او ګډ کار پر اړتیا ټینګار وکړ، څو اداري چارې په موثره توګه پرمخ ولاړې شي.
په ورته مهال، د مسکن، ودانیزو چارو او برنامو د پراختیا محترم معین مولوي گل زرین صابر، د وزارت د سرپرست له خوا له بېلابېلو څانګو لیدنه یو مثبت ګام وباله، چې له مخې به کارکوونکي لا وهڅول شي، نوموړي د کار، صداقت او ولس ته د خدمت په برخه کې د کارکوونکو د لا زیات تعهد غوښتنه وکړه.
معین صاحب زیاته کړه، چې د یاد معینیت انجنیران او اداري کارکوونکي لوړ تخصصي او مسلکي ظرفیت لري، او د رښتيني خدمت په موخه له هېڅ ډول هڅو دریغ نه کوي.
بل خوا، د یاد معینیت یو شمېر رئیسانو او کارکوونکو ژمنه وکړه چې خپلې دندې به د امکان تر بریده په غوره ډول ترسره کوي.
