د کور او ښار جوړولو وزارت سرپرست د کابل له والي سره وکتل
۱۴۴۶/۰۸/۰۳
د کور او ښار جوړولو وزارت محترم سرپرست وزیر الحاج شیخ حمدالله نعماني په خپل کاري دفتر کې د کابل ولایت له محترم والي مولوي امین الله عبید سره وکتل او په یو شمېر مهمو موضوعاتو یې خبرې اترې وکړې.
په ناسته کې، د کابل محترم والي په دغه ولایت کې د شته ښاري ستونزو، وړاندیزونو او پرمختیایي چارو په تړاو خبرې وکړې.
د نوي کابل ښار ستره ملي پروژه، د کابل اداري کمپلیکس، کابل کې د مساجدو جوړېدو څرنګوالی او وضعیت، ښاري پراختیا، د اړوندو ادارو ترمنځ بشپړه همکاري او همغږي او ځینې نور موارد هغه موضوعات وو چې، هر اړخیز بحث پرې وشو.
ورپسې، د کور او ښار جوړولو وزارت محترم سرپرست وزیر شیخ حمدالله نعماني پر هغه لارو چارو خبرې وکړې چې، په عملي کېدا سره به یې تر ډېره بریده ستونزې حل او د یو پرمختللي کابل لپاره لاره هواره شي.
د کور او ښار جوړولو وزارت هڅې پیل کړي چې، انډولیزه پراختیا رامنځته شي او هېوادوالو ته په زړه پورې ښاري خدمات وړاندې شي.
