د قول هزاره ښارګوټي چارې وځنډول شوې
۱۴۴۶/۱۲/۸
د کور او ښار جوړولو وزارت له ښاري تخلفاتو د مخنیوي ریاست محترم رئیس مولوي عبدالمنان حقاني وایي، تخنیکي ټیم یې په کابل کې د قول هزاره استوګنیز ښارګوټي له وضعیت څارنه او ارزونه وکړه.
ښاغلی مولوي حقاني وایي، په یاده لیدنه کې څرګنده شوه چې په ښارګوټي کې د دوو بېلابېلو فازونو ودانیزې چارې روانې دي.
نوموړی وایي، دا چې یاد ښارګوټي تفصیلي پلان نه درلود، نو تخنیکي ټیم یې د یاد ښارګوټي ودانیزې چارې وځنډولې.
ښاغلی حقاني زیاتوي، اړوندو کسانو ته یې معلومات ورکړل چې ژر تر ژره دې د ښارګوټي لپاره تفصیلي پلان چمتو او بیا دې چارې روانې کړي.
دوی خبر ورکړی، چې قول هزاره ښارګوټی تر اوسه پورې تفصیلي پلان نه لري، او د ښاري اصولو مطابق، تر هغه وخته چې تفصیلي پلان نهایی نه شي، په یاده سیمه کې هر ډول ودانیز فعالیتونه بند دي.
د کور او ښار جوړولو وزارت ټینګار کوي چې ټول اشخاص، مؤسسې او ساختماني شرکتونه باید د قانوني او ښاري مقرراتو له مخې عمل وکړي، او د پلان تر بشپړېدو مخکې له هر ډول ودانیزو فعالیتونو ډډه وکړي، تر څو د ښار نظم، ترتیب او قانوني پراختیا خوندي پاتې شي.
