د کابل ښار د ۱۶مې ناحیې د ده خدایداد ساحې جامع ښاري مطالعات بشپړ شول
۱۴۴۷/۰۷/۲۳
د کور او ښار جوړولو وزارت د محترم مقام د منظورۍ له مخې، په کابل ښار کې د سپینو ساحو د پراختیا په موخه روانو ښاري مطالعاتو په لړ کې د ۱۶مې ناحیې اړوند د ده خدایداد ساحې جامع، علمي او تخنیکي مطالعات په بریالیتوب سره بشپړ شول. یادې مطالعې د ښاري پراختیا لپاره د سیمې د ظرفیتونو د تشخیص او د منظم پلان جوړولو په موخه ترسره شوې دي.
د ښاري مطالعاتو د رئیس په لارښوونه، مسلکي تخنیکي ټیمونو د یادې ساحې فزیکي، تخنیکي او چاپېریالي ارزونه ترسره کړه، دغه ارزونه د ساحوي سروې، د معلوماتو د تحلیل او مستقیمو مشاهداتو پر بنسټ ترسره شوې او د ځمکې تخنیکي وضعیت، زیربناوې، ټولنیز او اقتصادي شرایط او د اوبو سرچینې یې تر پوښښ لاندې نیولي دي.
ده خدایداد ساحه د احمد شاه بابا مېنې او مکروریان څلورلارې تر منځ موقعیت لري او له اصلي ښاري سړکونو سره یې نښلونې د ترانسپورتي لاسرسي اسانتیاوې زیاتې کړې دي. د ښاري پلان له مخې، دغه ساحه د منځنیو او لوړو پوړیزو استوګنیزو ودانیو لپاره ځانګړې شوې او اټکل کېږي چې د سلګونو کورنیو لپاره د معیاري استوګنې زمینه برابره کړي.
د سپینو ساحو لپاره ښاري مطالعات د کابل ښار د منظمې پراختیا، د نفوسي فشار د کمولو او د دوامدار ښاري ژوند د رامنځته کولو لپاره یو مهم بنسټ بلل کېږي.
