د ښار جوړولو او ځمکو وزارت سرپرست د لوګر ولایت له یو شمېر قومي مشرانو سره وکتل
۱۴۴۳/۰۹/۲۵
د ښار جوړولو او ځمکو وزارت سرپرست محترم مولوي حمد الله نعماني په خپل کاري دفتر کې د لوګر ولایت له یو شمېر قومي مشرانو سره وکتل او د دوی د ستونزو د حل لپاره یې هر اړخیز بحثونه وکړل.
په دغه لیدنه کې د لوګر ولایت قومي مشرانو د یاد ولایت په (ده مغلانو) کې د خپلو مالچرونو او ځمکو د ستونزو په اړه خبرې وکړې او د وزارت له سرپرست یې غوښتنه وکړه چې د ستونزو د حل برخه کې ورسره بشپړه همکاري وکړي.
د ښار جوړولو او ځمکو وزارت سرپرست محترم مولوي حمد الله نعماني د یادو قومي مشرانو د خبرو او دلایلو اورېدو وروسته هغوی ته قناعت ورکوونکې خبرې وکړې او ډاډ یې ورکړ چې تر خپلې وسې به د خلکو ستونزو ته رسېدنه کوي.
د ښار جوړولو او ځمکو وزارت سرپرست ژمن دی چې حق حقدار ته وسپاري او هېڅ لوری زیانمن نه شي.
