د پکتیکا په درې ولسوالیو کې روغتیایي مرکزونه او سوداګریز مارکېتونه جوړېږي
۱۴۴۵/۱۲/۲۹
پکتیکا ولایت کې د کور او ښار جوړولو ریاست محترم رئیس مولوي محمد طاهر سیف الجهاد په خپل کاري دفتر کې د جلال سوداګریز مرکز له رئیس سره وکتل.
دواړو لوریو په دغه ولایت کې د روغتیایي مرکزونو، عبادت ځایونو او سوداګریزو مارکېټونو پر جوړولو خبرې وکړې.
د جلال سوداګریز مرکز مشر ویلي، پلان لري چې د پکتیکا په دريو (۳) ولسوالیو زرغون شهر، نعمت اباد او سروضې کې روغتیایي مرکزونه، عبادت ځایونه او سوداګریز مارکېټونه جوړ کړي.
نوموړي ویلي، په پام کې لري چې په هره یاده ولسوالۍ کې یو یو روغتیایي کلېنیک، جامع مسجد شریف او سوداګریز مارکېټ جوړ کړي.
د یاد سوداګریز مرکز د مشر د معلوماتو له مخې، دغه مرکزونه به څلرویشت (۲۴) ساعته برېښنا، د موټرو تم ځای، اطفایه او د اور وژنې منظم سیستم، د اوبو رسولو معیاري سیستم او انټرنیټ ولري.
د کور او ښار جوړولو رئیس محترم مولوي محمد طاهر سیف الجهاد دغه سوداګر او پانګوال ته د هر ډول او بشپړې همکارۍ ډاډ ورکړ او زیاته یې کړه چې د کور او ښار جوړولو ریاست انجینري ټیم به د پلان او طرزالعمل مطابق د په پام کې نیول شوو تعمیرونو په جوړولو کې همکاري وکړي.
د پورته ذکر شوو چارو په ترسره کېدو سره به د یادو ولسوالیو خلکو ته معیاري خدمات وړاندې شي او د ژوند په دغه یادو برخو کې به یې ستونزې تر یو بریده راکمې شي.
د کور او ښار جوړولو وزارت هڅې پیل کړي چې د افغان ولس لپاره د ژوند په بېلا بېلو برخو کې ګڼې اسانتیاوې رامنځته کړي.
