د ملګرو ملتونو مسؤلیت هم ده، چې د افغان مهاجرو د حقوقو خوندیتوب لپاره کار وکړي
۱۴۴۶/۱۰/۲۶
د اسکان دایمي کمېټې چې مشري یې د کور او ښار جوړولو وزارت کوي، په سرپُل ولایت کې افغان مهاجرو ته نمرې ووېشلې.
مهاجرو ته د نمرو د وېش په مراسمو کې د سرپُل مرستیال والي وویل، مهاجرو ته د ځمکو د وېش بهیر پیلېدل په نېک پال نیسي او خوښ دی چې په دغه ولایت کې هم بې وزله مهاجرو ته د کورونو جوړولو په موخه د نمرو د وېش بهیر پیل شو.
په مراسمو کې، د ریاسة الوزرا محترم عالي مقام ښاغلي اداري مرستیال مولوي عبدالسلام حنفي وویل، امارت به شته امکانات د خپلو مهاجرو ورونو په خدمت کې ورکړي او مهاجر دې هم خپل هېواد ته راستانه شي.
ښاغلي حنفي وویل، د کور او ښار جوړولو وزارت په مشرۍ د اسکان دایمي کمېټه کار کوي چې په هر ولایت کې د مهاجرو د دایمي مېشتېدو لپاره ځمکې تشخیص کړي، سروې یې بشړه کړي او د نورو تخنیکي چارو ترڅنګ یې تفصیلي پلان چمتو کړي چې بیا د لییست مطابق پر بې وزله مهاجرو وېشل کېږي.
سرپل کې مهاجرو ته د نمرو د وېش مراسمو کې د کور او ښار جوړولو وزارت محترم سرپرست وزیر الحاج شیخ حمدالله نعماني وویل، امارت خپلې هڅې روانې کړي دي، خو نړیوال او په ځانګړې توګه ملګري ملتونه هم مسؤلیت لري چې د افغان مهاجرو د حقوقو خوندیتوب لپاره کار وکړي.
ښاغلي شیخ حمدالله نعماني وویل، سرپُل ولایت کې چې کوم ښارګوټی جوړ او ځمکې یې وېشل کېږي، په (۱۲۴۷) جریبه ځمکه کې جوړ ده، چې (۱۰۵۳) نمرې لري او په ټولو ښاري معیارونو برابر شوی دی.
مساجد، ښوونځي، کتابتون، سوداګریزې ساحې او د ژوند نورې اسانتیاوې په کې په پام کې نیول شوي دي.
په اخر کې د کور او ښار جوړولو وزارت محترم سرپرست وزیر الحاج شیخ حمدالله نعماني د خپلو خلکو د خدمت لپاره له (الله ج) توفیق وغوښت.
