د لوړو زده کړو وزارت اړوند د نیمه کاره پروژو په تړاو خبرې وشوې
۱۴۴۶/۴/۶
د کور او ښار جوړولو وزارت محترم سرپرست وزیر الحاج شیخ حمدالله نعماني، په خپل کاري دفتر کې د لوړو زده وزارت د محترم مالي او اداري مرستیال حافظ محمد حامد حسیب سره د یاد وزارت اړوند نیمه کاره پروژو د برخلیک معلومولو په تړاو خبرې وکړې.
په ناسته کې، د لوړو زده کړو وزارت محترم مرستیال حافظ محمد حامد حسیب وویل، وزارت یې په ځینې ولایتونو کې د پوهنتونونو لپاره ودانۍ نه لري او په خبره یې اړتیا ده چې نیمه کاره پروژې یې بشپړې شي.
د کور او ښار جوړولو وزارت محترم سرپرست وزیر الحاج شیخ حمدالله نعماني وویل، د ټولو نیمه کاره پروژو د چارو د ځنډ لامل د پراختیایي بودیجې کمښت دی، چې په خبره یې که خپله د لوړو زده کړو محترم وزارت هم بودیجه ترلاسه کړي، نو د کور او ښار جوړولو وزارت په هماغه ورځ چمتو دی چې پاتې چارې پیل او بشپړې یې کړي.
ښاغلي وزیر وویل، ټول هغه وزارتونه چې د کور او ښار جوړولو له وزارت سره یې پروژې په نیمه حالت کې پاتې دي، بودیجه دې ترلاسه کړي چې دغه وزارت یې د پروژو اړوند پاتې چارې پیل او بشپړې کړي.
د کور او ښار جوړولو وزارت هڅې کوي چې ورسپارل شوي مسؤلیتونه په سمه توګه اداء او د هیواد په پرمختګ کې ونډه واخلي.
