د جمهوریت روغتون د لا معیاري کېدو په تړاو له یوې ترکي کمپنۍ سره خبرې وشوې
۱۴۴۶/۴/۱۹
د کور او ښار جوړولو وزارت محترم سرپرست وزیر الحاج شیخ حمدالله نعماني په خپل کاري دفتر کې د یوې ترکي کمپنۍ له مسؤلینو سره وکتل.
په دغه کتنه کې د یاد وزارت د مسکن، ودانیزو چارو او د برنامو پراختیا محترم مرستیال الحاج محمد اسماعیل فائز او د وزارت نورو اړوندو رئیسانو او مسؤلینو هم شتون درلود، چې په کې د جمهوریت روغتون پر لا معیاري کېدو، نېمګړتیاو په نښه کولو او د حل لارو پر موندلو خبرې وشوې.
الحاج شیخ حمدالله نعماني وویل، موخه دا ده، چې څنګه کېدای شي د جمهوریت روغتون په اساسي او معیاري شکل و رغول شي او د نورو ټولو برخو ترڅنګ یې د اکسیجن، راډیولوژي او راډیو تراپي څانګې په نړیوالو معیارونو برابرې شي.
د ترکي کمپنۍ مسؤلینو وویل، د روغتونونو معیاري کېدو برخه کې کافي تجربې لري او زیاته یې کړه، چې که ورته د کار کولو زمینه برابره شي، د جمهوریت روغتون ټولې چارې او څانګې به معیاري کړي.
ښاغلي شیخ حمدالله نعماني، د ترکي کمپنۍ مسؤلینو ته ځینې نقشې او پلانونه ورپه ګوته کړل چې دوی په کې نیمګړتیاوې د حل لارو سره په ګوته کړي او بیا دې یې د وزارت له مقام سره شریک کړي.
د یادو اسنادو تر کتنې، ارزونې او حل لارو شریکولو وروسته به بشپړ راپور د ریاسة الوزرا محترم عالي مقام له اداري مرستیال محترم مولوي عبدالسلام حنفي سره شریک او د راتلونکو اقداماتو لپاره به تابیا ونیول شي.
د کور او ښار جوړولو وزارت هڅې پیل کړي چې په هېواد کې د ټولو خدماتي چارو څانګې او خدمات معیاري شي، نورو هېوادونو ته د ناروغانو له تګ او زیات لګښت مخنیوی وشي او ټولې چارې په کور دننه ترسره شي.
