د افغانستان او ازبکستان ترمنځ د ودانیزو پروژو په اړه تازه خبرې
۱۴۴۶/۱۱/۱۴
د کور او ښار جوړولو وزارت محترم سرپرست وزیر الحاج شیخ حمدالله نعماني، په خپل کاري دفتر کې د ازبکستان هېواد د ښار جوړولو وزارت د ودانیزو پروژو محترم مسؤل شیرزاد عادلوف او مل هیئت سره وکتل.
په دې مهمه ناسته کې، ښاغلي عادلوف وویل، له هغه سره راغلي هیئت کې د بېلابېلو ودانیزو شرکتونو مسؤلین شامل دي چې د ودانیو د طرحې او ډیزاین، ښاري زیربناء، هوایي ډګرونو، توپوګرافي، او د ساختماني موادو چمتو کولو په برخو کې فعالیت کوي.
نوموړي وویل، دوی غواړي په افغانستان کې د کور او ښار جوړولو وزارت سره ګډې همکارۍ ته وده ورکړي.
د کور او ښار جوړولو وزارت محترم سرپرست وزیر، الحاج شیخ حمدالله نعماني، د ښه راغلاست ترڅنګ وویل، افغانستان کې د ودانیزو پروژو د پرمختګ لپاره د افغانستان او ازبکستان متخصصینو تجربې او پوهې باید یو له بل سره شریکې شي.
ښاغلي نعماني زیاته کړه، د افغانستان په ودانیزو چارو کې موجودې ستونزې د ګډې همکارۍ له لارې حل کیدای شي.
هغه وویل، تمه ده چې سږ کال به د افغانستان په بېلا بېلو سیمو کې ګڼ شمېر ودانیزې پروژې پیل شي، چې له دې سره به ساختماني موادو ته پراخه اړتیا پیدا شي.
ښاغلي سرپرست وزیر د ازبکستاني شرکتونو څخه غوښتنه وکړه، چې د دې موادو چمتو کولو ته مناسب نندارتون او بیې ورکړي، تر څو د ودانیزو پروژو لپاره لازم توکي په ښه توګه برابر شي.
په ورته وخت کې، ښاغلي عادلوف د کور او ښار جوړولو وزارت مسؤلینو او انجنیرانو څخه غوښتنه وکړه چې په کابل کې د ازبکستان د ساختماني موادو او مهندسي شرکتونو نندارتون څخه لیدنه وکړي.
دغه راز، ښاغلي عادلوف د افغانستان د کور او ښار جوړولو وزارت محترم سرپرست وزیر الحاج شیخ حمدالله نعماني ته بلنه ورکړه، تر څو ازبکستان هېواد ته سفر وکړي، د ازبکستان د کور او ښار جوړولو وزیر او مسؤلینو سره لیدنې وکړي او د دواړو هېوادونو ترمنځ د ګډې همکارۍ لپاره نوې لارې پرانیزي.
په پای کې، وزیر نعماني د کور او ښار جوړولو وزارت اړوندو ریاستونو ته لارښوونه وکړه، چې د ازبکستاني متخصصینو سره د همغږۍ لپاره لازم تدابیر ونیسي او د راتلونکو اقدماتو لپاره لاس په کار شي.
