د ادرسکن ولسوالۍ د زراعتي خدماتو مدیریت د تعمیر د رغنیزو چارو برآورد ترسره شو
۱۴۴۷/۰۳/۰۷
د هرات ولایت د ښار جوړولو او کور ریاست محترم رئیس انجنیر عبدالله اکبري وایي، د دې ریاست اړوند تخنیکي ټیم د کرنې، اوبو لګولو او مالدارۍ ریاست د مکتوب پر بنسټ د ادرسکن ولسوالۍ د زراعتي خدماتو مدیریت ودانۍ د ترمیماتو لپاره لومړنی برآورد ترسره کړ.
ښاغلي انجنیر اکبري وویل، په دې سروي کې د یاد تعمیر له بېلابېلو برخو لیدنه وشوه او د ارزونې موخه د ودانۍ د فزیکي وضعیت څېړل د عاجلو او ضروري ترمیمي اړتیاوو مشخصول، د زیانمنو برخو پېژندل او د کارکوونکو لپاره د مناسب کاري چاپېریال برابرول وو.
د یادولو وړده، چې د کور او ښار جوړولو وزارت د هېواد په کچه د عامه ودانیو د ساتنې، ترمیم او بیارغونې چارې د خپلو اساسي دندو برخه بولي او د دې چارې هدف د دولتي ادارو لپاره د خوندي، معیاري او د کار وړ ودانیو برابرول دي تر څو د خلکو لپاره د خدمتونو د وړاندې کولو کیفیت لوړ شي.
