د زرنج ښار د درېیم او پنځم پلان ساحو کې د غیرقانوني ودانیو د مخنیوي په موخه تخنیکي څارنه ترسره شوه
۱۴۴۷/۱۲/۰۶
د نیمروز ولایت د کور او ښار جوړولو ریاست اړوند د ښاري سرغړونو د مخنیوي تخنیکي ټیم، د زرنج ښار د درېیم او پنځم پلان ساحو کې د ښاري پلانونو د سم تطبیق او د غیرقانوني تاسیساتو د مخنیوي په موخه تخنیکي او ساحوي څارنه ترسره کړه.
د ساحوي ارزونې پر مهال څرګنده شوه، چې په یادو سیمو کې د ځینو استوګنیزو ودانیو ساختماني چارې د تخنیکي نقشو او قانوني اسنادو پرته روانې دي، چې دا چاره د نافذه ښاري اصولو او منظور شوو پلانونو خلاف عمل ګڼل کېږي.
له همدې امله د تخنیکي ټیم له لوري د پروژو مالکینو ته جدي سپارښتنه وشوه، څو ژر تر ژره د خپلو پروژو قانوني اسناد، تخنیکي نقشې او اړوند مدارک د یاد مدیریت سره شریک کړي، ترڅو د هغو پر بنسټ لازم قانوني او تخنیکي اقدامات ترسره شي.
د دغو څارنو اساسي موخه د ښاري پلانونو دقیق تطبیق، د غیرقانوني ودانیو مخنیوی، د ښاري نظم تأمین او د سالم ښاري مدیریت پیاوړتیا ده.
