د کابل ښار په اوولسمه ناحیه کې د طلایي ښارګوټي له تخنیکي وضعیت څخه هر اړخیزه څارنه ترسره شوه
۱۴۴۷/۱۱/۰۶
د کور او ښار جوړولو وزارت، د ښاري سرغړونو او د پروژو پر تطبیق د څار محترم عمومي ریاست اړوند د ښاري سرغړونو د مخنیوي ریاست تخنیکي ټیمونو، د منظم او دوامداره نظارتي پروګرامونو په لړ کې د کابل ښار په اوولسمه ناحیه کې د طلایي ښارګوټي له وضعیت څخه ساحوي تخنیکي څارنه ترسره کړه.
د دغه څارنې په ترڅ کې د ښارګوټي بېلابېلې تخنیکي برخې د مسلکي ټیمونو له لوري هر اړخیزې وارزول شوې. په یادو ټیمونو کې د سایت پلان، استوګنیزو او سوداګریزو واحدونو، عامه تأسیساتو، د سړکونو شبکې، د اوبو رسونې او کانالیزاسیون، برېښنا او فایبر نوري شبکو، او همدارنګه د ښارګوټي د حریم او حدودو متخصصین شامل وو.
د څارنې پر مهال څرګنده شوه، چې په ښارګوټي کې یو شمېر پلاني سرغړونې ترسره شوې دي، چې له ډلې یې د استوګنیزو واحدونو د شمېر غیرمجاز زیاتوالی، د سړکونو پر مسیرونو د خپل سرو دوکانونو جوړول او د عامه ګټې ساحو د کارونې بدلون یادولی شو.
د یادولو ده، چې د څارنې دا لړۍ به د کاري پلان له مخې په دوامداره توګه روانه وي او د کابل ښار نور ښارګوټي به هم په نږدې راتلونکې کې تر تخنیکي ارزونې او څارنې لاندې ونیول شي.
