د کور او ښار جوړولو وزارت او د تخنیکي او مسلکي زده کړو ادارې ناسته وکړه
۱۴۴۶/۷/۱۳
د کور او ښار جوړولو وزارت محترم سرپرست وزیر الحاج شیخ حمدالله نعماني په خپل کاري دفتر کې د تخنیکي او مسلکي زده کړو ادارې له مشر محترم مولوي غلام حیدر شهامت سره وکتل.
په دغه ناسته کې، د تخنیکي او مسلکي زده کړو ادارې محترم رئیس مولوي شهامت د یادې ادارې د فعالیتونو او لاسته راوړنو په تړاو معلومات وړاندې کړل او زیاته یې کړه چې، د ځوانانو لپاره یې د مسلکي زده کړو زمینه برابره کړې، هڅه کوي چې د بازار د غوښتنې په اساس مسلکي کادرونه ټولنې ته وړاندې کړي.
نوموړي د کور او ښار جوړولو وزارت له محترم سرپرست وزیر وغوښتل چې، له دغې ادارې فارغ شوو زده کوونکو ته په کور او ښار جوړولو وزارت کې د کار کولو زمینه برابره کړي.
د کور او ښار جوړولو وزارت محترم سرپرست وزیر الحاج شیخ حمدالله نعماني، د همکارۍ ډاډ ورکړ او زیاته یې کړه، د کور او ښار جوړولو وزارت مسلکي وزارت دی چې، تر دې دمه په کې خلک د رشتې او وړتیا پر اساس د ازادو سیالیو له لارې په دندو ګمارل شوي چې، دا لړۍ دوام لري.
تصمیم ونیول شو چې، له دواړو خواو دې یوه ګډه کمېټه جوړه او د تازه فارغ شوو کسانو د جذب لپاره دې طرحه او برنامه جوړه کړي.
