د پنځه سوه فامیلي څلورلارې څخه تر شتل سړک پورې د شنې ساحې څارنه ترسره شوه
۱۴۴۸/۲/۴
د کور او ښار جوړولو وزارت د کیفیت کنټرول او ښاري سرغړونو ته د رسېدنې لوی ریاست اړوند د ښاري مخنیوي ریاست تخنیکي ټيم، د کابل ښار د یوولسمې ناحیې په شنه ساحه کې له پنځه سوه فامیلي څلورلارې څخه تر شتل سړک او د تاجکان سړک تر امتداد پورې تخنیکي څارنه ترسره کړه.
یاده څارنه د کور او ښار جوړولو وزارت د مقام د لارښوونې او د دوامدارو نظارتي پروګرامونو په چوکاټ کې ترسره شوه.
د څارنې پر مهال د شنې ساحې په امتداد له هغو مالکینو، دوکاندارانو، د ساختماني توکو له پلورونکو، د لرګیو له سوداګرو، ورزشي کلبونو (جمنازیومونو) او نورو مستأجرینو څخه، چې په یاد مسیر کې فعالیت کوي، د دویم ځل لپاره وغوښتل شول چې د مخکې ټاکل شوې مودې په ترڅ کې خپل ټول قانوني اسناد او مدارک د ارزونې په موخه د ښاري سرغړونو ته د رسېدنې ریاست تخنیکي ټیمونو ته وسپاري، ترڅو په دې اړه د کور او ښار جوړولو وزارت له لوري وروستۍ پرېکړه وشي.
د دې څارنې موخه د ښاري قوانینو او نافذه مقرراتو د رعایت ارزونه، د شنو ساحو ساتنه، د احتمالي ښاري سرغړونو مخنیوی، د ښاري نظم پیاوړتیا او د معیاري ښاري پراختیا لپاره د قانوني اقداماتو زمینه برابرول دي.
د کور او ښار جوړولو وزارت د کیفیت کنټرول او ښاري سرغړونو ته د رسېدنې لوی ریاست ټینګار کوي چې د ښاري نظم د تأمین، د عامه شتمنیو او شنو ساحو د ساتنې او د ښاري قوانینو د پلي کېدو په موخه به دا ډول څارنې په دوامداره توګه دوام ولري.
