د کابل ښار په درېیمه ناحیه کې د ودانیزو چارو له بهیر څخه تخنیکي څارنه ترسره شوه
۱۴۴۷/۱۰/۲۲
د کور او ښار جوړولو وزارت ښاري سرغړونو ته د رسېدنې ریاست اړوند د تخلفاتو د مخنیوي او عامه پوهاوي تخنیکي ټیمونو له لوري، د دوامدارو څارنو په لړ کې د کابل ښار په درېیمه ناحیه کې د ودانیزو چارو له بهیر څخه ساحوي څارنه ترسره شوه.
یاده څارنه د وزارت د مقام د هدایت پر بنسټ ترسره شوې، چې په ترڅ کې یې د پوهنتون له سړک څخه تر کوټه سنګي څلور لارې او د دهبوري تر ساحو پورې د بېلابېلو ودانیو وضعیت وڅېړل شو.
د څارنې پر مهال د ودانیو ویزه شوې نقشې د موجوده ساختماني وضعیت او منظور شوو ښاري پلانونو سره پرتله شوې.
همدارنګه، هغه ودانیز فعالیتونه چې د نافذه قوانینو او ښاري پلانونو د احتمالي سرغړونو نښې پکې موجودې وې، د لا زیاتو ارزونو لپاره تر څېړنې لاندې ونیول شول. د پروژو له ټولو مالکینو غوښتنه وشوه، چې خپل قانوني اسناد، جوازونه او اړوند مدارک د ښاري سرغړونو ته د رسېدنې ریاست ته وړاندې کړي، څو د دقیقې ارزونې وروسته، د هر ډول سرغړونې په صورت کې لازم قانوني اقدامات ترسره شي.
ټاکل شوې ده، چې د یاد ریاست د کاري پلان له مخې دا ډول څارنې دوام ومومي او د ښار نورې ساحې به هم په راتلونکو ورځو کې تر څارنې لاندې ونیول شي.
